Sokol Balla, pas më shumë se një viti në Vizion Plus, do të lëvizë sërish drejt një tjetër televizioni. Sipas CNA.al, gazetari do të marrë në duar drejtimin e News 24 dhe drejtimin e një emisioni politik aty, i cili dyshohet të jetë “Të paekspozuarit” që momentalisht ka në krye Ylli Rakipin. Thuhet se Balla do të sjellë zhvillime në strukturën e televizionit dhe se marrëveshja është përfunduar.

Gazetari u transferua në Vizion Plus në janar të 2018-s, pasi u shkarkua nga detyra si drejtor informacioni në Top Channel. Në Vizion ai shërbeu si drejtor ekzekutiv dhe moderoi emisionin politik “Real Story” çdo të hënë.

Prej dy vjetësh, të hënave, në Vizion Plus, transmetohej “Dritare” i Rudina Xhungës. Në momentin që filluan të qarkullonin fjalët e para për lëvizjen e Ballës, ajo u largua nga televizioni pa deklaruar shkaqet pas vendimit.

Gjithashtu, në një intervistë për “Thumb,” Rudina tregoi se përvoja më e shëmtuar në Top Channel kishte njëfarë lidhjeje me Sokol Ballën. Për një vit e pak, “Shqip” me Rudina Xhungën ishte konkurrenti i drejtpërdrejtë i “Opinion” me Blendi Fevziun. “Krejt papritur, Tani na thërret në një mbledhje të gjithëve dhe më thotë ‘Dëgjo Rudina, ti s’mund të jesh Larry King. Larry King-e s’ka. Kështu që atë burrin e të enjtes do ta mposhtë një burrë tjetër.’ E kishte për Sokol Ballën,” tha ajo në fund të marsit të vjetshëm.

Një shokim dhe një incident i Rudinës e bindi Tan Hoxhën të lejonte transmetimin e “Shqip” të hënave dhe të “Top Story” të enjteve, përkatësisht për 13 dhe 11 vite.

Pas kësaj, prej 9 nëntorit, “Dritare” filloi të transmetohej të martave në News 24. Ndërsa “Të paekspozuarit” me Ylli Rakipin, emisioni që pritet të marrë në duar Sokol Balla, transmetohej të enjteve. Në dukje nuk ka asnjë përplasje mes dy gazetarëve, por na mbetet të presim shtatorin për të parë nëse kjo do të ndryshojë.