SHBA dhe Irani rikthehen në tryezë, delegacionet mbërrijnë në Zvicër për bisedimet e paqes
Delegacionet e Shteteve të Bashkuara dhe Iranit kanë mbërritur në Zvicër për raundin e ri të bisedimeve mbi zbatimin e marrëveshjes së përkohshme të paqes mes Uashingtonit dhe Teheranit. Negociatat do të zhvillohen në Bürgenstock, në kantonin e Nidwaldenit.
Në takim do të marrë pjesë edhe zëvendëspresidenti amerikan JD Vance, ndërsa Pakistanit i është besuar sërish roli i ndërmjetësit mes palëve. Vance deklaroi para nisjes se pret me optimizëm zhvillimin e bisedimeve.
Vala e të nxehtit godet Francën, ndalohet alkooli në festivalin e famshëm të Parisit
Autoritetet franceze kanë ndaluar konsumimin e alkoolit gjatë festivalit vjetor “Fête de la Musique”, ndërsa vendi po përballet me temperatura ekstreme. Në Paris pritet që temperatura të arrijë deri në 35 gradë Celsius, ndërsa në jug të Francës dhe Spanjë deri në 40 gradë.
Mbi 30 departamente janë vendosur në alarm të kuq për shkak të vapës. Për të ndihmuar qytetarët të përballojnë temperaturat, autoritetet kanë vendosur që parqet dhe kopshtet publike të qëndrojnë të hapura 24 orë në ditë.
Sulmet ruse lënë të vdekur dhe të plagosur në Ukrainë, Kievi godet objektiva në Siberi
Të paktën tre persona humbën jetën dhe 22 të tjerë u plagosën pas një serie sulmesh ruse në lindje të Ukrainës. Autoritetet lokale raportuan se dronë, artileri dhe bomba ajrore goditën disa zona të rajoneve Dnipropetrovsk dhe Poltava.
Ndërkohë, presidenti ukrainas Volodymyr Zelensky njoftoi se forcat ukrainase kanë goditur një impiant përpunimi nafte në rajonin rus të Tiumenit, në Siberinë Perëndimore. Sipas tij, sulmi u krye me dronë të rinj që mund të godasin objektiva deri në 3 mijë kilometra larg.
Trump dhe Meloni në përplasje publike, debati për një foto ndez tensionet
Presidenti amerikan Donald Trump ka përsëritur pretendimin se kryeministrja italiane Giorgia Meloni i ka kërkuar vazhdimisht të bëjnë një foto së bashku gjatë samitit të G7. Deklarata vjen pasi Meloni i hodhi poshtë komentet e tij, duke i cilësuar si tërësisht të sajuara.
Kryeministrja italiane reagoi sërish në rrjetet sociale, duke i quajtur sulmet e Trumpit të pakuptimta dhe të pajustifikuara. Marrëdhëniet mes dy liderëve janë ftohur muajt e fundit për shkak të mosmarrëveshjeve mbi Iranin dhe disa çështje të politikës ndërkombëtare.
