Aroma e kafesë po pushton sërish gjithçka, këtë herë jo vetëm filxhanin tënd, por edhe raftin e bukurisë. Nga parfume që të "përqafojnë" me aromë kafeje e deri te shkëlqyesi i buzëve që duket si një kafe latte, 2025-a po shpallet zyrtarisht si viti i bukurisë me shije kafeje.
Bukuri që pihet (pothuajse)
Kultura e kafesë është bërë një ritual më vete, që nga momenti kur zgjedh filxhanin, e deri tek aroma që mbush kuzhinën. Për shumë njerëz, kafeja nuk është vetëm një pije; është një përkëdhelje e vogël e përditshme, një ndjesi ngrohtësie dhe relaksi. Dhe tani, kjo përkëdhelje po kalon në botën e bukurisë.
Në TikTok,ky është bërë trendi më i ri: vajza që ndjekin estetikën e viteve ’90, me ndriçim të ngrohtë, grim në nuanca të kafesë dhe lëkurë me shkëlqim të butë sikur je sapo zgjuar nga kafeja e parë e ditës.
Parfumet me aromë kafeje: Të japin ndjesinë e një mëngjesi të ftohtë, ku aroma e kafesë përzihet me çokollatë dhe vanilje. Janë perfekte për ata që duan diçka të ëmbël, por elegante.
Buzë si “ekspres”: Ngjyrat e kafesë, nga kapuçino e butë deri tek ekspresi i errët po dominojnë këtë sezon. Shkëlqyesit e buzëve me nuanca çokollate janë kthyer në trend.
Paletat e syve: Kafe, karameli, dhe bronz; një kombinim që i shkon çdo ngjyre lëkure.
Kafe për flokët dhe lëkurën: Produktet me kafe ndihmojnë në rigjallërimin e lëkurës dhe në stimulimin e flokëve për rritje më të shëndetshme.
Qirinj me aromë kafeje: Sepse, pse të mos ndihesh sikur je në kafenenë tënde të preferuar, edhe kur je në shtëpi?
“Pijet” e bukurisë që po bëhen virale
Nga serumi me kafeinë që zbut rrathët poshtë syve, te zbutësi i buzëve që kujton një kafe të ftohtë, ky trend ka një ide të qartë: të zgjojë lëkurën dhe ndjenjat, njësoj si filxhani yt i parë i kafesë.
