Rregullat janë bërë për tu thyer, dhe kjo shprehje vlen edhe kur bëhet fjalë për modën. Deri tani jemi mësuar me parimet bazë të fashion-it të cilat na janë dukur sikur kanë egzistuar gjithmonë. Këtë sezon do t’ju këshillonim që në vend që t’i ndiqni rregullat e modës të përpiqeni t’i thyeni ato.
"Mos miksoni printet"
Kuadrate dhe vija? Florale dhe kafshë? Thuajini po! Miksimet më të çuditshme të printeve janë ngjitur këtë vit në pasarela nga stilistët më me famë në botë. Duke krijuar kështu pamje tërësisht maksimaliste.
"Mos miksoni metalet"
Nëse metali i orës tuaj të preferuar është në ngjyrën rose gold, mos hezitoni ta kombinoni me një byzylyk të argjendtë. Këtë vit miksmi i metaleve është një “PO” e madhe. Kjo nuk vlen vetëm për aksesorët por edhe për printet metalikë në veshje.
"Mos vish lëkurë në verë"
Xhaketat e lëkurës janë aq të dashura. Visheni xhaketën tuaj të preferuar në çdo stinë të vitit pa u menduar dy herë!
"Streçet vishen vetëm në palestër"
Epo nuk është kështu. Guru-të e modës po i veshin streçet e tyre me çdo gjë dhe në çdo dalje. Pse të mos ndjesh komoditetin e streçeve edhe në një veshje të sofistikuar?
"E zeza dhe bluja nuk shkojnë bashkë"
Shkojnë që çke me të. Këtë na e tregojnë kombinimet që blogeret e modës po bëjnë me veshjet e tyre.
"Rrobat e ngushta theksojnë kilogramët e tepërt"
E çfarë pastaj? Për sa kohë që ju ndiheni mirë me fizikun që keni mund të vishni çfarë të doni.
"E zeza është ngjyrë dimërore"
Nëse e zeza është ngjyra juaj e lumturisë atëherë visheni në çdo stinë. Asgjë nuk ju ndalon.
"Atletet e shëmtuara vishen vetëm në palestër"
Epo jo tamam. Marka të njohura të veshjeve luksoze si Versace, Gucci dhe Dolce Gabbana sapo kanë prezantuar koleksionet e tyre me atlete të shëmtuara. Pra këto atlete nuk janë më të shëmtuara.
"Kombino çantën me këpucët"
Jo më, ky kombinim nuk është asgjë tjetër veçse i dalë jashtë mode.
