Modeli, aktivisti dhe filantropisti shqiptar, Elton Ilirjani nuk kishte si të mos merrte të gjithë vëmendjen e këtij viti në Javët e Modës të cilat do të nisin më 21 gusht. Ilirjani njihet ndërkombëtarisht jo vetëm për stilin e tij unik në pamje, por edhe për ndjesitë humane dhe ngritjes së shpeshtë të zërit kundër dhunës me bazë gjinore.
Me fokusin në këtë të fundit, biznesmeni i njohur do të hapë Javën e Modës këtë vit me Institutin Kombëtar të Modës INA, në të cilin do të zhvillohen dhe një sërë aktivitetesh kundër dhunës ndaj grave. Ai pritet të shkëlqejë me finesën që e karakterizon në çdo dalje, ashtu siç ka ndodhur gjithmonë në evente madhështore të botës së modës ku ka qenë pjesëmarrës.
I njohur në mbarë botën si influencues i lartë në rrjete sociale, Ilirjani numëron një shifër ndjekësish që të lë pa frymë. Mbi 12 milion fansa në mbarë botën janë të përkushtuar për të dëgjuar dhe mësuar nga mesazhet e tij për barazinë gjinore. Një problematikë që po shtohet shumë nga dita në ditë dhe për të cilën pak e flasin. Ai promovon rëndësinë e barazisë dhe lirisë së shprehjes përmes konceptit të modelimit pa gjini në pasarela dhe kopertinat e revistave ndërkombëtare prestigjioze si Gurus, Forbes, Elle, New York Weekly, etj.
Shfaqja e Elton Ilirjanit në Javët e Modës nuk do të jetë thjesht një pasarelë, por do të jetë një moment historik për të ngritur edhe njëherë me forcë zërin kundër ‘Femicidit’.
Tashmë është bërë zyrtare edhe kalendari ku ai do të marrë pjesë, duke nisur me Costa Rica Fashion Week e cila do të zhvillohet më 21- 24 gusht dhe në disa vende të tjera si: New York Fashion Week 8-11 shtator, Milan Fashion Week 17- 23 shtator, Paris Fashion Week 23 shtator- 2 tetor, si dhe në Tiranë në disa aktivitete duke përfshirë “The Miss Globe”.
