Për fat të mirë, u bë e mundur që Alvin Berisha të nxirrej nga kampi famëkeq Al-Hol, si rezultat i bashkëpunimit të Gjysmë Hënës Siriane, Kryqit të Kuq si edhe autoriteteve italiane dhe shqiptare. Por nga ana tjetër, jo të gjithë patën fatin e 11-vjeçarit.

Sipas raportimit të A2 News, në kamp ndodhen të paktën 80 shqiptarë. Një pjesë e tyre, fëmijë, jetojnë pa prindërit dhe janë të ekspozuar ndaj dhunës psikologjike dhe fizike.

“[Jam] 10 vjeç. Kam shtatë muaj këtu [në Siri]. Më solli babi. Nuk e di ku është,” dëgjohet të thotë një fëmijë për televizionin A2.

Grupi i xhirimeve i po të njëjtit televizion, i përbërë nga gazetari Julian Kasapi dhe operatori Endrit Myftari, arriti të futej brenda kampit duke siguruar edhe dëshmi nga të pranishmit. Disa gra shqiptare rrëfyen se jetojnë në çadra dhe kërkojnë që autoritetet shqiptare të ndërhyjnë për t’i kthyer në Shqipëri.

Për fat të keq, nuk dihet se ç’ka ndodhur pasi Kasapi dhe Myftari kanë humbur gjurmët.

Ndjekësit vendosin në pikëpyetje mënyrën si do të realizohet kthimi në atdhe i shtetasve shqiptarë që ndodhen në territoret e kontrolluara nga ISIS.