Ish-Miss Shqipëria 2012, Niki Delijorgji, tregoi për Anabel.al në mars të 2018-s se pas shumë eksperiencave në fushën e modelingut, ka hequr dorë duke qenë se impenjimin më të madh po ia kushtonte disa projekteve të tjera. Një ndër të duket se është edhe muzika, një tjetër pasion i saj.

“Ta publikoj këngën time të parë këtë verë,” i pyet ajo ndjekësit në Instagram dhe sigurisht që pjesa dërrmuese bie dakord. Nisur nga një tjetër postim, duket se kënga do të jetë e rrymës pop.

E kontaktuar nga Anabel.al, Niki tregon për herë të parë disa detaje të këngës së parë. “Nuk dua të ndaj shumë gjëra për projektin tim, por mund të them që teksti do të jetë anglisht, sepse nuk dua të kufizohem në tregun shqiptar dhe më vjen më lehtë të shkruaj në anglisht,” shprehet ajo.

Në vijim, Niki zbuloi se teksti është shkruar nga vetë ajo dhe se arsyeja pse ka zgjedhur të jetë artiste është se “dëshiron që përmes artit të saj të shërojë dhe motivojë njerëzit”.

“Kënga ka kuptim të thellë dhe çdo njeri mund të krijojë historinë e vetë nga ajo që dëgjon dhe sheh në klip.”

Në vijim gjeni edhe disa video të Nikit duke kënduar: