Idetë më “in” për thonjtë që do t’i duash për pushimet e verës

Foto: @overglowedit / @nailsby_hal/ Instagram

Vera është stina e preferuar për modele thonjsh, pa asnjë diskutim. Ndoshta është dielli, fustanet verore apo energjia e pushimeve që ndihet kudo, por gjatë muajve të ngrohtë gjithmonë duam të provojmë diçka më argëtuese me manikyrin, sidomos kur kemi planifikuar një udhëtim.

Pavarësisht nëse të pëlqejnë dizajnet ekstravagante apo preferon diçka minimaliste dhe elegante, vazhdo leximin për manikyrët më perfektë të verës që duhen ruajtur para takimit të radhës në sallon.

Më poshtë, idetë më të bukura për thonjtë e pushimeve, për çdo aventurë verore.

Thonjtë me vija

Ky model i frymëzuar nga peshqirët e plazhit do të duket shumë i lezetshëm ndërsa rri shtrirë pranë detit. Mund të zgjedhësh vija të holla në gjithë thoin ose vetëm në majat e tij. Luaj me ngjyrat që të pëlqejnë më shumë, sepse këtu nuk ka zgjedhje të gabuar.

Thonjtë perlë

Shkëlqimi si perlë është ideal për verën dhe kombinohet perfekt me bizhuteritë. Mund të shtosh edhe perla të vogla, tekstura të fryra apo baza me efekt ylberi për ta personalizuar.

Thonjtë “oqean”

Përshtati thonjtë me atmosferën e detit të vendit ku do të pushosh këtë verë. Vizato krijesa deti, guaska, lule tropikale apo çdo detaj tjetër që të kujton plazhin. Ky është versioni elegant i stilit “sirenë”.

Thonjtë rozë me shkëlqim

Nëse do diçka të thjeshtë, por që duket luksoze, zgjidh një rozë me shkëlqim që kombinohet me çdo veshje. Mbaje paksa transparente për atë efektin si pelte dhe do të përshtatet perfekt me të gjitha veshjet e pushimeve.

Thonjtë me pika

Thonjtë me pika ishin kudo verën e kaluar, por ky version minimalist me vetëm një ose dy pika duket shumë më elegant. Zgjidh kombinimet e tua të preferuara të ngjyrave dhe vendos pikat në mënyrë strategjike mbi thonj ose në majën e manikyrit francez për një pamje të thjeshtë, por interesante.

Thonjtë me lule

Manikyri me lule është klasik i motit të ngrohtë, por këtë vit vjen me shumë variante më interesante. Nëse do diçka më ndryshe se lulet tradicionale, provo efektin e shpërndarë të ngjyrës ose modele me lule të fryra dhe me teksturë, të frymëzuara nga vitet ’80.

Thonjtë “vera europiane”

Nëse këtë verë do të udhëtosh në Europë, ose thjesht do të futesh në atë atmosferë, provo një manikyr të frymëzuar nga Mesdheu. Nga sardele të vogla si në rivierën franceze te motivet elegante të pllakave italiane, çdo detaj të çon direkt me mendje te pushimet buzë detit. Vetëm duke i parë, të vjen dëshira të bësh gati valixhen.