Genta Ismajli është e dashuruar dhe më e lumtur se kurrë. Kemi gjithsej një foto dhe një video të çiftit bashkë, por aq mjafton. Dimë që i dashuri i këngëtares është turk, merret me biznes dhe jeton në Zvicër.
Dje mbrëma, i dashuri misterioz i bëri një surprizë Gentës. Në urën e Bosforit shkroi “Seni Seviyorum Genta,” që do të thotë “Të Dua Genta,” të paktën kaq kuptojmë nga postimet e këngëtares në Instagram. Këndshëm deri këtu. Pastaj, burime të tjera thonë se plasën fishekzjarret dhe se Gentës i propozuan për martesë. Besojmë se ka pranuar, kështu që urime.
Nga ky propozim na u kujtua një tjetër artikull që kemi bërë dikur, në lidhje me propozimet për martesë. Nuk lamë cep (virtual) pa kërkuar dhe s’e gjetëm, por gjithsesi, ideja është kjo: Disa njerëz s’i kanë problem propozimet për ditëlindje, disa më mirë t’i vrasësh me arsyetimin e thjeshtë se gjërat duhen festuar më vete. Ditëlindja është ditëlindje. Përvjetori është përvjetor.
Në rastin e Gentës, duam të dimë sa nga ju i pëlqejnë këto surprizat e mëdha, që bëjnë bujë e tërheqin vëmendjen e kalimtarëve. Dhe sa nga ju do të shtriheshin në tokë në pozicion fetusi nga sikleti po t'ju propozonin në publik.
