Foto: mothering/ Pinterest

Nëse ka një “superfuqi” që shumë gra e kanë pa e kërkuar, është aftësia për të bërë disa role njëkohësisht: profesioniste në punë, menaxhere në shtëpi, nënë, partnere, bijë, mike dhe shpesh, shtylla kryesore emocionale e të gjithëve. Mes orareve të zgjatura, trafikut, përgjegjësive familjare dhe pritshmërive sociale, balanca mes jetës dhe punës duket thuajse e pamundur.

Megjithatë, disa gra arrijnë ta mbajnë veten “mbi ujë” jo sepse kanë më pak ngarkesë, por sepse kanë krijuar zakone të zgjuara që i ndihmojnë të mos shkatërrohen nga stresi. Ja cilat janë më të zakonshmet:

1. Heqin dorë nga “i bëj të gjitha vetë”

Një person mesatar merr rreth 35 mijë vendime në ditë. Vetëm kjo mjafton për lodhje mendore. Shumë prej tyre janë të vogla e rutinë, por nëse i thjeshton ose i automatizon disa procese, e lehtëson veten.

Energjia duhet shpenzuar aty ku ka më shumë vlerë: te familja, te zhvillimi personal, te një aftësi e re apo edhe te një kurs gatimi që të çlodh.

2. Ndërtojnë një sistem mbështetjeje në shtëpi

Nëse punon me orë të gjata, stresi i punës është i mjaftueshëm. S’ka pse t’i shtosh edhe stresin e menaxhimit të çdo detaji në shtëpi. Ndihma për gatimin, pazarin, pastrimin apo kujdesin për fëmijët nuk është luks, por strategji.

Nëse organizon mirë anën e shtëpisë, je më e lirë të fokusohesh në punë dhe ta mbyllësh më shpejt. Suksesi varet nga planifikimi dhe komunikimi si me ekipin në punë, ashtu edhe me “ekipin” në shtëpi.

3. Planifikojnë edhe kur janë të lodhura

Përgatitja është gjysma e punës. Trajnerja familjare Calvalyn Day këshillon: merr 15 minuta çdo mbrëmje për të përgatitur ditën e nesërme. Edhe kur je e rraskapitur, do të të kursejë shumë stres.

Pak organizim gjatë fundjavës ose në pushimin e drekës mund të bëjë diferencë të madhe.

4. Bëjnë pushime (pa ndjenja faji)

Sipas një studimi nga University of Illinois, puna pa pushim ul fokusin dhe produktivitetin. Trupi dhe mendja kanë nevojë për rifreskim.

Trajnerja e biznesit Kristen David sugjeron të caktoni orare fikse për t’u ngritur nga tavolina, për të ngrënë drekë dhe për ta mbyllur ditën. Një pushim 5-10 minuta mund të të rikthejë energjinë për projektin tjetër.

5. E marrin seriozisht gjumin

Gjumi cilësor është armë sekrete. Rekomandohen rituale të vogla para gjumit: një dush i ngrohtë, një çaj kamomili, një rutinë e qëndrueshme. Edhe alarmi jo shumë i fortë në mëngjes bën diferencë.

6. Ushqehen siç duhet (jo si t’u vijë për mbarë)

“Duhet patjetër të hash ushqime që nuk të rëndojnë”, thotë Colleen Lloyd-Roberts. Më shumë proteina, fruta dhe perime; më pak ushqime që të lënë të fryrë dhe pa energji.

Edhe nutricionistja Lisa Richards sugjeron përgatitjen paraprake të vakteve ose të ushqimeve të vogla të shëndetshme, për të shmangur zgjedhjet e shpejta plot sheqer.