Ylli i K-pop-it dhe anëtarja e Blackpink, Lisa (Lalisa Manobal), po përballet me kritika të shumta pas paraqitjes së saj në Met Gala 2025, për shkak të një detaji në veshje që u konsiderua fyes nga shumë njerëz.
Lisa u shfaq me një veshje të Louis Vuitton që përfshinte një xhaketë me dantellë, geta të zeza me logon e LV, të brendshme, këpucë me takë dhe një çantë të markës. Në veshje janë të qëndisura portrete të figurave të njohura, mes tyre edhe aktivistja e të drejtave civile, Rosa Parks, konkretisht në zonën e të brendshmeve. Ky detaj u vu re nga njerëzit në rrjete sociale dhe u cilësua si i papërshtatshëm, sidomos në kontekstin e temës së këtij viti.
Rosa Parks ishte një nga figurat më të rëndësishme të lëvizjes për të drejtat civile në SHBA. Ajo u bë ikonë pasi refuzoi t’i lëshonte vendin një burri të bardhë në një autobus në vitin 1955. Veprimi i saj shërbeu si nisje e protestave kundër padrejtësive raciste të asaj kohe.
Tema e Met Gala 2025 ishte “Superfine: Tailoring Black Style”, me fokus në historinë e stilit të komunitetit afrikano-amerikan.
Edhe pse Louis Vuitton nuk ka konfirmuar nëse portreti në fjalë është me të vërtetë i Rosa Parks, prania e imazhit në atë pjesë të veshjes u cilësua si një zgjedhje jo vetëm e pandjeshme, por edhe thellësisht e papërshtatshme për një event që synon të nderojë kulturën dhe historinë e komunitetit afro-amerikan.
Për më tepër, dalja e Lisa-s vjen vetëm disa javë pasi një video e vjetër e grupit Blackpink qarkulloi online, ku anëtaret – përfshirë Lisa, Jennie dhe Rosé – akuzohen për përdorimin e fjalës ofenduese “n*gga”, pa asnjë reagim apo kërkim faljeje publike.
Deri tani, as Lisa dhe as përfaqësuesit e saj nuk kanë komentuar për situatën.
Artikuj të sugjeruar:
