Aktorin e dashur të humorit, Florjan Binaj, të gjithë e njohim si policin e 'Portokallisë'. I ftuar në emisionin “Pa Filtër”, të drejtuar nga moderatorja Jona Spahiu, Flori ka treguar një tjetër dimension të tijin, jashtë kornizave të aktorit, por gjithmonë nën petkun e artistit.
Prej disa vitesh baba i 2 fëmijëve, Glaukut, i cili erdhi në jetë në fillim te dhjetorit të 2016-ës dhe Krenas, vajza e parë e çiftit, Flori tregon për jetën brenda shtëpisë.
Me kohën e limituar, Flori rrëfen se ai ka zgjedhur të shfrytëzojë çdo moment të lirë për të krijuar. Pa mbaruar mirë një shfaqje, atij i duhet të krijojë patjetër diçka për javën e ardhshme. Para dëshirës për të imituar dhe për të bërë humor, Flori ka patur gjithmonë një pasion të madh, pikturën, pasion të cilin e kultivon çdo ditë. I pyetur nëse përpara famës që gëzon tani a i ka pëlqyer gjithmonë protagonizmi, ai është shprehur: “Më ka pëlqyer gjithmonë, pasi kam dashur të bëj të tjerët për të qeshur. Imitoja dhe sensi i protagonizmit ishte i pandashëm tek unë.”
Në një shtëpi të mushur plot me të qeshura fëmijësh dhe piktura të tij dhe bashkëshortes, Flori tregon: “Unë punoj gjatë kohës së lirë, edhe Sadina po ashtu, por ka akoma hapësira për të mbushur. Tani që sollëm në jetë 2 ëngjëj, do të merremi me ato që kemi lënë përgjysmë.
I pyetur në lidhje me partneren e tij të jetës, ai rrëfen se lidhja e tyre daton që prej pjesëmarrjes së tij të parë në “Portokalli”, kur të dy ishin ende gjimnazistë. Për Florin, ajo ka qenë dashuri me shikim të parë, siç thotë dhe vetë më humor, një zë i brendshëm në kokë, i tha: “Kjo është!”
Teksa kamera fokusohet në ambientet e apartamentit të tij, muret janë të mbushura plot me krijime të aktorit, por ajo që nuk i shpëton dot syrit është portreti i vajzës së tij, Krenës. Me sytë që i vezullojnë dhe mimikën lozonjare, Flori tregon se është një nga pikturat më të veçanta për të.
I organizuar dhe praktik, ai rrëfen se për të bijën do të donte një fëmijëri si e brezit të tij, pa telefona nëpër duar dhe shumë sporte, madje do të ishte krenar nëse ajo do të eksperimentonte në çdo fushë të artit.
Një pjesë të mirë të ditës dhe jetës së tij e zë shtëpia e 2-të e humoristit, “Portokallia”, ku prej 13 vitesh tashmë është rritur bashkë me vetë spektaklin. Binaj na rrëfen se rrugëtimi nisi si krejt rastësisht dhe vetëm puna e palodhur mund ta çojnë njeriun drejt suksesit, pavarësisht sfidave.
“Publiku nuk do t’ja di nëse nuk je i frymëzuar, nuk i intereson. Ata duan të qeshin çdo javë, dhe ne shpërblehemi me duartrokitjet dhe me rrogën, sigurisht.”-përfundon ai duke qeshur.
