Beyoncé dhe “Sasha Fierce”: Truku psikologjik që ju ndihmon të mposhtni pasigurinë

Kur dilte në skenë në fillimet e karrierës së saj, Beyoncé nuk e bënte këtë si vetja. Ajo shndërrohej në “Sasha Fierce”, alter egon që krijoi për të përballuar nervozizmin dhe presionin e performancës. Dhe sipas ekspertëve, kjo strategji nuk funksionon vetëm për yjet e muzikës, por mund të ndihmojë këdo që përballet me pasiguri.

Psikoterapistja dhe autorja e librit “The Mental Strength Playbook”, Amy Morin, thotë se gjatë gati 25 viteve të punës së saj ka parë shumë njerëz të talentuar të bllokohen nga vetëdyshimi. Pavarësisht përgatitjes apo aftësive, pasiguria mund t’i pengojë të shprehin potencialin e tyre maksimal.

Pse funksionon një alter ego?

Kur dyshimi ndaj vetes merr kontrollin, mendja fillon të fokusohet tek gjithçka që mund të shkojë keq. Kjo shpërqendron vëmendjen nga detyra që kemi përpara.

Në vend që të përpiqemi të bindim veten të mos ndihemi nervozë, ekspertët sugjerojnë një qasje tjetër: të futemi në rolin e dikujt që nuk ndikohet nga frika apo ankthi.

Beyoncé e përshkroi këtë proces në një intervistë me Oprah Winfrey në vitin 2008.

“Është si kur luan një personazh në film. Sapo vesh rrobat dhe paruken, ecën ndryshe”, shpjegoi ajo.

Sipas këngëtares, “Sasha Fierce” shfaqej pikërisht në momentet para se të dilte në skenë.

 “Kur dëgjoj turmën dhe vesh takat e mia, atëherë shfaqet Sasha Fierce. Qëndrimi im, mënyra si flas dhe gjithçka tjetër ndryshon.”

Edhe figura të tjera të njohura, si këngëtarja Adele dhe basketbollisti Kobe Bryant, kanë folur publikisht për përdorimin e alter egove për të performuar më mirë.

Çfarë thotë shkenca?

Kjo teknikë bazohet në një koncept psikologjik të quajtur “distancim nga vetja”. Duke marrë përkohësisht rolin e dikujt tjetër, krijojmë distancë nga mendimet ankthioze dhe emocionet negative.

Studimet tregojnë se kjo ndihmon trurin të largohet nga zonat që lidhen me reagimet emocionale dhe të aktivizojë më shumë korteksin prefrontal, pjesën përgjegjëse për mendimin racional dhe vendimmarrjen.

Një eksperiment me fëmijë tregoi se ata që imagjinonin veten si personazhe si Batman ishin më këmbëngulës dhe më të motivuar sesa ata që mendonin vetëm si vetja.

Si të krijoni alter egon tuaj?

1. Zgjidhni personazhin tuaj

Mund të jetë një person real që admironi, një personazh imagjinar ose edhe versioni më i mirë i vetes suaj.

Nëse ju duhet guxim, mund të mendoni për Serena Williams. Nëse ju duhet qetësi dhe vetëkontroll, mund të frymëzoheni nga dikush që mishëron këto cilësi.

2. Krijoni një simbol fizik

Një aksesor i vogël mund të shërbejë si “çelësi” që ju fut në atë gjendje mendore. Mund të jetë një orë, një unazë, një palë këpucë apo një xhaketë e veçantë.

Rëndësi ka domethënia që i jepni objektit.

3. Mishëroni sjelljen e alter egos

Pyeteni veten: “Si do të vepronte ky person në këtë situatë?”

Vëzhgoni mënyrën si do të qëndronte, si do të fliste dhe si do të reagonte. Më pas përpiquni të silleni në të njëjtën mënyrë.

4. Filloni me hapa të vegjël

Mos e provoni për herë të parë në një moment shumë të rëndësishëm. Praktikojeni në situata me më pak presion, si një mbledhje pune apo një bisedë të zakonshme.

Me kalimin e kohës, kjo teknikë mund të kthehet në një armë të fshehtë që ju ndihmon të nxirrni në pah versionin më të sigurt dhe më të fortë të vetes, pikërisht kur keni më shumë nevojë për të.