Zgjedhjet për rektorët e universiteteve dhe dekakët e fakulteteve në Shqipëri qenë parashikuar të mbaheshin në fund të marsit, por për shkak të pandemisë, ministrja e Arsimit, Sportit dhe Rinisë, Besa Shahini, e shtyu datën e zgjedhjeve më 12 qershor. Nisur nga situata e deritanishme, a shkojnë zgjedhjet kundër ligjit?
Vlen të thuhet së fushata nis më 11 maj, kohë gjatë së cilës studentët nuk janë në universitet. Në urdhrin për marrjen e masave për vitin akademik 2019-2020, ministrja Shahini theksoi vijueshmërinë e mësimit online për mbylljen e planeve mësimorë në çdo program studimi. Në auditor do të kthehen me kohë të pjesshme vetëm studentët të cilët janë në prag diplomimi ose kanë nevojë për përsëritje, konsultime, zhvillim të punëve të laboratorit etj. Pra, për aq kohë sa studentët nuk janë nëpër fakultete këto kohë, natyrshëm lind pyetja se në ç’formë do të prezantohet programi i atyre që pritet të drejtojnë institucionet ku studentët do të vijojnë ciklin e studimeve?
Vërtet studentët kanë pak peshë në votim, vetëm 10%, por sidoqoftë është një e drejtë që njihet dhe mbrohet me ligj.
Në rregulloren “Për organizimin e zgjedhjeve për autoritetet drejtuese dhe senatin akademik në Universitetin e Tiranës” në nenin 38 për “Pavlefshmërinë e zgjedhjeve” thuhet se Komisioni Institucional i Zgjedhjeve i shpall zgjedhjet në universitet si të pavlefshme në rast se (pika b) “kanë ndodhur fatkeqësi natyrore në përmasa të atilla, që kanë penguar pjesëmarrjen e zgjedhësve në votim”. Kujtojmë se gjendja e fatkeqësisë natyrore përfundon më 23 qershor.
Në fakt, rektori i Universitetit të Tiranës, Mykyr Koni, njoftoi se nuk do të zhvillohen zgjedhje pa studentë, ndërkohë që mbetet ende e paqartë se si do të vijojë procesi në universitetet e tjera.
