E keni parasysh “Eurotrip?” Ku një grup miqsh bredhin Europën dhe i hapin telashe vetes? Fiks ashtu është episodi i gjashtë i Hostelit, vetëm se janë Megi, Viola dhe Ana në Milano që ca nga pakujdesia, ca nga padurimi, e gjejnë veten në situata të çuditshme.

Shkurtimisht, ja çfarë ndodhi:

Ana njohu një djalë teksa kishin dalë për të pirë, i cili rastësisht ishte shqiptar. Një shqiptar në Milano? Që kur? Takimi i tyre u përgjua gjithë kohës nga Megi dhe Viola që shërbyen si komentatoret tona.

Të nesërmen në mëngjes mësuam se ai djali s’ishte dhe aq kavaljer dhe ndoshta s’bën për Anën.

Pasi gjetën rrugën drejt metrosë, vajzat vizituan të famshmin Piazza del Duomo, lanë kokën pas pëllumbave dhe brodhën dyqanet në Galleria Vittorio Emanuele II ku blenë reçipeta. Nga gjithë gjërat që mund të blinin, blenë reçipeta.

Rrugëve të Milanos, të pangrëna, xhepshpuara, Megi dhe Viola patën një ide gjeniale: Ana të këndojë, teksa ato kërcejnë për të fituar ndonjë kacidhe. (Lekët e dietës i bënë bukë dhe reçipeta.) E vetmja gjë që fituan ishin një grup çunash që i trembën me komentet e tyre kundër Putinit. Shihni episodin për të marrë vesh ku hyn Putini këtu.

Pasi Ana vodhi disa herë shtetin italian duke kaluar pa paguar nëpër trarët e metrosë, vajzat përfunduan në një fast food të mizershëm dhe për të marrë vesh çfarë ndodh më vonë, duhet të presim plot shtatë ditë.

Ky episod të bën vërtet të ndihesh sikur je në udhëtim me shoqet, të fal gëzim dhe e ndjen nga ekrani kureshtjen dhe entuziazmin për të parë më shumë, për të përjetuar më shumë, për të bërë kujtime.