Pavarësisht se pritet që pranvera të shënojë edhe uljen e rasteve të diagnostikuara me Covid-19, përsëri situata mbetet e paqartë. Sidoqoftë, duke nisur edhe nga eksperienca e Kinës, pritet që fillimisht të nisin lëvizjet brenda për brenda vendit, gjë që do të na bëjë të kthejmë sytë nga qytetet shqiptare. Përpos kësaj, është me rëndësi që pushimet t’i planifikoni në Shqipëri, pasi turizmi është një nga sektorët më të rrezikuar.

Në një lidhje me Ilva Taren në Ilva Now, ish-ministrja e Kulturës, Mirela Kumbaro, u shpreh (via Euronews.al):

“Mendoj se do të jetë e vështirë për sezonin e 2020 të parashikojmë turistë të huaj. Duke qenë se lëvizja brenda për brenda do të jetë më e lehtë fillimisht, mund të jemi një potencial të shfrytëzimit të biznesit brenda vendit. Kjo do t’i bëjë mirë biznesit, por ka edhe një aspekt psikologjik. Asnjë nuk e di si do të jetë sjellja e publikut kur kjo krizë të marrë fund, ndaj duhet të mobilizohemi. Mendoj se kjo është koha për turizëm patriotik. Të fillojmë të zbulojmë apo rizbulojmë vendet turistike të Shqipërisë përpara se të shpejtojmë të ikim nga Shqipëria. Dhe kjo karantinë do na ndihmojë  t’i shohim me një sy tjetë dhe për t’i dhënë një ndihmë turizmit të ringrihet.”

Nisur nga rëndësia e turizmit, Anabel Media nisi pak ditë më parë fushatën #ShqipëriaPasKarantinës, që ka për qëllim të theksojë rëndësinë që kanë pushimet në Shqipëri.

“Jemi shumë të sigurt që pas vetë-izolimit, kur t’i kthehemi jetës normale, një pjesë e mirë, fill sapo të ketë vendosur punët në vijë me financat, do të planifikojë pushimet. Shumë mirë do të bëni, por le t’u japim pak dashuri edhe qyteteve shqiptare, që në këto ditë izolimi, na duken më piktoreske se kurrë. Aq më tepër që kemi nevojë për njëri-tjetrin që të ringrihemi,” shkruhet nëpër postime.

Nisma nisi fillimisht me Beratin,

u pasua nga Tropoja,

Vlora,

Korça,

Shkodra dhe do të vazhdojë me të tjera qytete dhe vende të Shqipërisë.