Gazetari Taulant Kopliku, një nga autorët e reportazhit të emisionit investigativ italian “Le Iene”, nisur nga raportimet e fundit ku thuhej se ISIS mori në kontroll kampin Al Hol, iu drejtua Facebook-ut për të bërë me dije të tjera detaje për Alvinin.
“Ka që dje që qarkullon në mediat shqiptare ky lajm. Normal është shqetësues dhe merr vëmendjen e duhur nga opinioni i një vendi që ka shtetasit e tij (fëmijë) atje,” shkroi ai. “Por fatmirësisht brenda lajmit të keq ka edhe lajme të mira."
Siç mund ta keni lexuar, nga mediat e huaja dhe më pas nga ato shqiptare, u tha se gratë e ISIS vendosën kalifatin e tyre brenda kampit Al Hol. Mendohej se ato përfituan nga kaosi i shkaktuar nga luftimet e forcave turke dhe kurde, për të krijuar një “mini shtet” me bazë matriarkale.
Por Kopliku thotë: “Në të vërtetë ka patur përplasje të vazhdueshme në kamp dhe kjo ka ndodhur edhe para ndërhyrjes turke. Djegia e çadrave, vrasjet me armë të ftohta apo dhuna mes grupeve dhe etnive kanë qenë prezente rregullisht në kamp. Kjo nuk do të thotë se ISIS mori në kontroll Al Hol.”
Ai thekson se për fat të mirë, Alvin ndodhet nën kujdesin e “Save the Children”.
“Për të hyrë në temë. Sapo u informova nga Ada, vullnetarja e Save the Children në kamp,” u shpreh gazetari. “Edhe sot ajo e ka kontaktuar Alvinin, i cili është nën kujdesjen e kësaj organizate. Në sektorin ku ndodhet i vogli, nuk ka as më të voglin problem nga ato që shkruhen në media. Kam bindjen se shumë shpejt do të kemi lajme të mira. #AlvinNëShtëpi.”
Shtojcë: Save the Children – fond i krijuar nga Mbretëria e Bashkuar në 1919-n për të përmirësuar jetën e fëmijëve anembanë botës përmes arsimit, kujdesit shëndetësor dhe ekonomik si edhe sigurimit të ndihmës emergjente në rastet e fatkeqësive natyrore, luftrave dhe konflikteve të tjera.
