Vetë Adelina Ismaili është ikonike dhe si rrjedhim, edhe veshjet e saj. Për të kanalizuar divën tuaj të brendshme këtë 31 tetor, zgjidhni një nga look-et e mëposhtme.

Veshja e parë, nga “Sajzezo,” është për trimet që e marrin guximin të dalin me trupore prag dimrit për hir të modës. Rripat, choker-i dhe flokët rrica janë shumë të rëndësishëm.  

Nga “Mos ma ndal,” Adelina kokë e këmbë e kuqe, me pantallona lëkure dhe një kanotjere që lidhet në qafë. Plus, shumë zinxhira dhe një rrip gjigant. Madje, nëse jeni zënë me të dashurin për Halloween, edhe kënga është fiks për ju.

Për ato që duan të dalin, por jo të thajnë, veshja skenike e Adelinës në “Zemrën nuk ta fal” ka bluzë të bardhë Dash, pantallona me kuadrata dhe një pellush lejla. Në fakt, tani që e shohim, kjo vishet kurdoherë.

S’kishim pikë dyshimi që Adelina ka veshur diçka që s’pranon të brendshme të paktën njëherë. Ky fustan mund të jetë pak më i vështirë për t’u gjetur në dallim nga veshjet e tjera, por ia vlen.

Dhe për grupet e shoqeve që sapo e çuan nëpërmend të veshin kostume matchy-matchy për Halloween, katër veshjet e Adelinës nga klipi i “Shko në RS.” Kemi përshtypjen se të gjitha këto i gjeni në një dyqan të lirë.