Duka dhe dukesha e Sussex-it kanë marrë një vendim të pazakontë duke vendosur të padisin tabloidin britanik The Mail on Sunday, referuar një letre me shkrim dore që Meghan i ka dërguar dikur babait të saj.
Padia erdhi si pasojë e një veprimi të jashtëzakonshëm të princit Harry ndaj tabloidëve për mënyrën si kanë trajtuar figurën e Meghan-it duke u shprehur se nuk mund të jetë më “dëshmitar i heshtur i vuajtjeve të saj”.
Duke theksuar respektin për rëndësinë e “raportimit objektiv dhe të vërtetë”, në faqen e tij zyrtare, ai akuzoi mediat që kanë zhvilluar “fushata kundër individëve të ndryshëm, pa menduar pasojat.”
Harry e krahasoi trajtimin që i është bërë Meghan-it me atë të nënës së tij. “[Dikur] humba nënën, ndërsa tani po shoh gruan time të jetë viktimë e këtyre forcave të fuqishme,” tha ai referuar mediave. (Lady Diana ishte një ndër figurat më të komentuara nga shtypi britanik, para dhe pas vdekjes).
Nisur nga e ëma, Harry tha se “frika e tij më e madhe është që historia të përsëritet”. Më pas shtoi: “Vjen një pikë kur e vetmja gjë që mund të bësh është që të qëndrosh pa bërë asgjë ndaj kësaj sjelljeje, sepse shkatërron njerëzit dhe shkatërron jetët e tyre. Por ne të gjithë e dimë që kjo është e papranueshme, në asnjë nivel. Ne nuk mund dhe nuk duhet të besojmë se jetojmë në një botë ku nuk ka përgjegjësi për këtë gjë.”
Meghan dhe avokatët e saj kanë nisur procedurat në Gjykatën e Lartë dhe akuzojnë tabloidin për shpërdorim të informacionit privat, shkelje të të drejtave të njeriut dhe shkelje të të dhënave personale.
The Mail on Sunday ka trajtuar vazhdimisht figurën e Meghan Markle duke publikuar/shpikur histori të ndryshme, me në qendër të atin e saj. Në disa raste, janë inskenuar edhe fotografi të Thomas Markle gjoja të shkrepura nga paparacët.
Burimi: BBC dhe The Guardian
