Në listën e personazheve të famshëm shqiptarë të fiksuar pas palestrës, Dafina Zeqiri qëndron prej kohësh, të paktën në Top5. Megjithatë, përtej pamjes “perfekte” – në thonjëza sepse nuk ekziston një pamje e vetme perfekte – Dafi është njeri si gjithë të tjerët dhe nuk nguron ta shprehë hapur në Instagram si një mënyrë për të thënë se “jemi perfektë me të gjitha të metat tona”.

“Kam celulit, kam vena merimangë dhe madje dje gjeta një venë varikoze,” shkruan fillimisht këngëtarja.

(Shën.red. Venat merimangë quhen venat në formë gjarpëruese që mund të jenë në ngjyrë blu, të gjelbër ose vjollcë. Të ngjashme me rrjetin e merimangës, vena të tilla janë të dukshme në sipërfaqen e lëkurës, por nuk janë të ngritura dhe të dhimbshme si venat varikoze, të njohura si variçe. Ato shkaktohen përgjithësisht nga qëndrimi për shumë gjatë në këmbë, obeziteti, ndikimet hormonale gjatë pubertetit, shtatzënisë ose menopauzës, gjenetika etj).

Më pas, këngëtarja shkruan se ka mësuar ta dojë trupin e saj. “Kam mësuar t’i dua ashtu siç dua strijat. E di që njerëzit presin që personazhet e famshëm të jenë 'perfektë', por të gjithë e dimë se photoshop-i dhe dielli bëjnë magji. Jemi magjikë me të gjithë të metat tonë.”

Përsa i përket modelit të flokëve, sigurisht që Dafit i pëlqen po aq shumë sa i pëlqejnë të pasmet e saj.

“Duaje veten tënde, sepse njerëzit që gjykojnë janë të parët që nuk e vlerësojnë veten,” përfundon Dafina.