Dy ditë më parë, përmes një postimi tepër të ngarkuar emocionalisht, Pamela Anderson njoftoi ndarjen nga futbollisti Adil Rami.
“E kam të vështirë ta pranoj. Dy vitet e fundit të jetës sime kanë qenë një gënjeshtër. Më mashtroi, më bëri të besoj se po përjetonim një dashuri të madhe. Këto ditë mora vesh se ai bënte një jetë të dyfishtë. Jam e rrënuar.”
Aktorja u shpreh se Rami thoshte vazhdimisht me shaka se lojtarë të tjerë mbanin dashnore në apartamente afër grave. Sipas saj, Rami i quante këta njerëz “përbindësha.”
“Por kjo është shumë më keq se aq. Ai na gënjeu të dyjave. Si mund të kontrollosh mendjet dhe zemrat e dy grave në këtë mënyrë. Jam e sigurt që ka pasur dhe të tjera.”
Para disa orësh erdhi edhe reagimi i shumëpritur, ai i lojtarit të Marsejës. Rami u shpreh se Pamela është një person të cilin e respekton vërtet shumë, se dashuria për të ka qenë gjithmonë e sinqertë dhe se kjo është e gjitha që sportisti kërkon të mbajë mend nga kjo lidhje.
“Nuk besoj se duhet të zbulojmë intimitetin, historinë tonë e cila na takon vetëm ne të dyve. Megjithatë dua të hedh pak dritë mbi diçka. Në asnjë momnet nuk kam patur jetë të dyfishtë. Thjesht jam treguar i gatshëm për të ruajtur një marrëdhënie sa më të gjate me fëmijët e mi dhe nënën e tyre, Sidonie- n, për të cilën kam shumë respekt. Është e vërtetë që duhet të isha treguar më transparent në këtë marrëdhënie disi të paqartë."
Ju kujtojmë se Anderson dhe Rami ishin bashkë që prej 2017-s. Në fillim të muajit u fotografuan pranë njëri-tjetrit, më të dashuruar se kurrë.
