Pas kritikës së Olti Currit në lidhje me nismën e Alketa Vejsiut për t’i sistemuar shtëpinë Xheisonit, vogëlushit të “Në kurthin e Piter Pan”, ka reaguar edhe vetë moderatorja, ndonëse jo në mënyrë të drejtpërdrejtë.
Si fillim, Alketa postoi në InstaStory një shprehje nga Oscar Wilde: “Asnjë vepër e mirë s’mund të shkojë pa u ndëshkuar”, e cila ironizon faktin që do të ketë gjithnjë njerëz që do të paragjykojnë, pavarësisht veprës apo qëllimit të mirë.
Më pas vazhdon me “Nuk është e nevojshme që njerëzit të bien dakord me çfarë thua ti, por ti duhet të jesh në gjendje ta thuash. Fol, fol shpesh dhe fol me zë të lartë,” nga Teresa C. Younger, Ceo dhe Presidente e “Ms. Foundation for Women”, organizatë jofitimprurëse.
Në fund, e mbyll me shprehjen e shkrimtarit britaniko-kanadez Robert W. Service, “Një premtim i bërë, është një borxh i pashlyer”.
Këtë fundjavë, Vejsiu vizitoi familjen e Xheisonit, ku përpos natyrës së mrekullueshme, u njoh më nga afër me disa nga problematikat me të cilat Xheison përballet dita-ditës.
Nisur nga gjendja ekonomike e familjes Bafti, Vejsiu shtoi se dëshiron që publiku (dhe jo vetëm) të kontribuojë sadopak “për t’i sistemuar shtëpinë vogëlushit”. “Në plot vende të botës, kur ka fëmijë me IQ të lartë e të spikatur, ka politika sociale që investojnë që këto mendje të veçanta të rriten dhe të zhvillohen. S’më kërkun asgjë, s’më është ankuar askush, por me dinjitetin e njerëzve punëtorë dhe të thjeshtë më pritën dhe më përcollën me një buzëqeshje!”
Olti Curri nga ana tjetër u shpreh përmes një InstaStory se “Xheisoni është pika e fortë dhe e vetme e këtij sezoni të ‘Në kurthin e Piter Pan’.” “Produksioni le të fusë më pak në xhep dhe të paguajë për atë që meriton ky personazh dhe do ja shndërrojë në ‘lypës’. Xheisoni meriton të paguhet më shumë se kushdo tjetër në atë spektakël sepse pa atë, spektakli do të ishte një funeral me sigla hapjeje dhe mbylljeje, asgjë më shumë.”
