Lidhja e aluduar e Young Zerkës me Ronela Hajatin diskutohet po aq sa u diskutua lidhja e aluduar e Klea Hutës dhe Elgit Dodës. Këta të fundit e pranuan kur erdhi momenti, po Zerka dhe Ronela, s’guxojnë as ta mohojnë, as ta pranojnë. Prandaj, kudo që ftohen, ngacmohen për njëri-tjetrin.
Mirage intervistoi shkurtimisht Zerkën në prapaskenat e klipit të tij të ri. Në 5 minuta e 23 sekonda video do ta dëgjoni aq shpesh fjalën “projekt” sa s’do të ketë më kuptim në veshët tuaj, por prandaj jemi ne këtu: që t’i zbardhim intervistat për ju.
Zerka tha të tre deklaratat e mëposhtme, të cilat fare mirë mund të shihen si konfirmim i një bashkëjetese mes dy artistëve.
1. “Ronelën e lashë në shtëpi pak se kishte punë me projektet e tjera. Ajo po punon me projektet e saja, unë me të miat.”
2. “Kemi shumë punë në projektet personale, kur të kemi diçka bashkë, një bashkëpunim do t’ju telefonojmë.”
3. “Gjithmonë dalin lajme për Zerkën [dhe Ronelën], si s’doli një lajm për Zerkën që ka bërë një këngë kështu, një këngë ashtu. Le të vazhdoni. [E vërteta] është që të dy bashkë po fokusohemi te projektet e reja, po dalin këngë shumë të bukura.”
Pra, jo vetëm thotë që Ronelën e la në shtëpi, por edhe flet në shumës.
