Këtë javë, kuratorët e një ekspozite në Firence zbuluan se (me shumë mundësi) skulptura që mbanin në duar ishte në fakt e vetmja e mbijetuar e llojit të saj, realizuar nga artisti Leonardo Da Vinci.
Ndonëse historikisht është thënë se Leonardo ka bërë disa skulptura (përfshirë edhe një kalë gjigant) kurrë nuk është gjetur një punim tredimensional nga ana e tij.
Fatmirësisht duket se "Virgjëresha me Foshnjën e Qeshur" përbën një përjashtim të mrekullueshëm. Mendohet se vepra në fjalë mund të jetë krijuar rreth vitit 1472, kur Leonardo ishte 19- 20 vjeç dhe nxënës i artistit Andrea del Verrocchio. Që prej vitit 1858, “Virgjëresha dhe Foshnja e Qeshur” gjendet në muzeun "Victoria and Albert", Londër, ku prej kohësh mendohej se i përkiste artistit Antonio Rossellino.
Francesco Caglioti, akademik italian në Universitetin e Napolit, i njohur në mesin e ekspertëve të Rilindjes për njohuritë e gjera rreth skulpturës së shekullit 15- të, ka bindjen se skulptura është vepër e Da Vinci- t. Teksa Virgjëresha sheh foshnjën, buzëqeshja që mbart është prototip i të gjitha buzëqeshjeve enigmatike në artin e Leonardo-s (kujtoni Mona Lisa- n).
Po kështu portreti i foshnjës Krisht është një tjetër pikë që shton dyshimet se me shumë mundësi skulptura është e gjeniut Da Vinci. Nëse do t’i hidhni një sy do vini re se Krishti- bebe duket kaq i gjallë, diçka kjo që karakterizon krijimtarinë e Leonardos mbi portretizimin e fëmijëve.
Përsa i përket portretizimit të Krishtit të qeshur, diçka e tillë në shekullin e 15- të konsiderohej tërësisht blasfemi. Ndërkohë, nisur nga shënimet në fletoret e tij, Da Vinci kujton se si në moshë të re pati probleme pikërisht sepse kishte portretizuar Krishtin të mitur.
A mund të ketë qenë kjo skulptura që futi gjeniun në telashe?
