Nëse herët, aty rreth viteve 2000, pati një bujë të telenovelave meksikane dhe spanjolle, disa vite më parë, gjithë vëmendjen e morën telenovelat indiane dhe serialet turke.
Top Channel u tregua i distancuar nga prodhimet turke dhe indiane, ndërkohë që Tv Klan ia doli që të thithte një shikueshmëri të madhe. Megjithatë, së fundmi u vu re një qasje e Klanit për të “rralluar” prodhimet indiane dhe për t’u përqëndruar më së shumti te serialet turke (të njohur si dizi), që duhet thënë gëzojnë një audiencë të madhe, e cila mbizotërohet më së shumti nga grupmoshat ende besnike të forta të televizionit.
Sidoqoftë, vihet re një qasje e dy televizioneve më të mëdha në vend për të transmetuar disa nga serialet më të përfolur të momentit, që kanë produksione dhe skenarë të jashtëzakonshëm, kanë fituar çmime ndërkombëtare si “Golden Globes” apo “Emmy”dhe janë mjaftueshëm të suksesshëm sa për të tërhequr vëmendjen e brezave që e gjejnë veten më së shumti online ose në platforma si “Netflix”.
Që prej 5 janarit, në Top Channel, ku për hir të së vërtetës janë transmetuar goxha seriale të famshëm ndërkombëtarë si “Game of Thrones” ose prodhime të suksesshme italiane, nisi transmetimin “Peaky Blinders”. E kontaktuar nga Anabel.al, drejtoresha e programacionit, Vjollca Dedei, u shpreh se Top Channel ka sjellë vazhdimisht seriale si “Peaky Blinders” përsa i përket suksesit dhe vlerësimit të kritikëve. Ju kujtojmë që “Peaky Blinders” është cilësuar si një nga 10 serialet më të famshëm të 2019-s dhe një nga serialet më të njohur me krim, mafiozë dhe intriga politike.
Nga ana tjetër, që në fillim të shtatorit, në një intervistë për “Rudina”, drejtori i programacionit në Tv Klan, Albert Dumani, u shpreh se “do të rikthejë telenovelat braziliane”, të cilat qenë po aq të suksesshme sa ato indiane dhe turke kur u transmetuan dhe theksoi surprizat.
Në Tv Klan u transmetua seriali dramatik politik amerikan, “House of Cards”. Seriali i jashtëzakonshëm, i cili ndjek jetën e një çifti amerikan me ambicie për të marrë zyrën më të rëndësishme në botë, atë të presidentit të Amerikës, u prit mirë nga audienca shqiptare. I kontaktuar nga Anabel.al, Albert Dumani u shpreh se “ndonëse audienca qe më e paktë se ajo e serialeve turke, seriali u prit mirë”.
Përpos “House of Cards”, që prej 13 janarit, në Tv Klan nis “Narcos”, një tjetër serial i suksesshëm me krim që bazohet në historinë e trafikantit legjendar të drogës, Pablo Escobar. “Pritshmëritë për Narcos janë të larta,” tha Dumani për Anabel.al.
Duket se kjo traditë dhe frymë e re në Klan do të vazhdojë, pasi ai theksoi se “do të ketë edhe të tjerë seriale në vijim”. Në intervistën për “Rudina” në shtator, shtoi se një ndër emrat e mundshëm është “Blacklist”, një serial që trajton historinë e Raymond Reddington, një ndër agjendëve ish-qeveritar më të kërkuar të globit.
