KESHILLA PER BLERJET TUAJA
Maska për fytyrë dhe flokë

Dimri është makthi i fytyrës suaj, por ja si t'ia hidhni paq me këto maska!

3 Janar 2019

Ne e kemi vërtetuar tashmë se e duam borën, sa mezi presim këto pak ditë të vitit kur ajo bie (nëse bie) për të vënë shallin, kapuçin dhe të realizojmë fotot e blogereve. Mirëpo me temperatura -14 gradë Celcius si këtë fundjavë, zor s’e lëkura jonë është po aq e lumtur sa ne.

Lëkura zakonisht thahet nga i ftohti. Zgjidhjen e kërkojmë tek kremrat e ndryshëm, që në thelb nuk është zgjedhje e gabuar, por mund t’ia lehtësojmë punën vetes duke realizuar disa maska me produktet që i gjejmë rëndom në shtëpi.

Maskë me qumësht dhe bajame

Bajamet janë të pasura me vitaminë E dhe acide yndyrore esenciale, ndërsa qumështi shërben si hidratues i mirë. Bëni bashkë një lugë gjelle me pluhur bajamesh (thjesht shtypini) dhe 2 lugë gjelle me qumësht të papërpunuar. Maskën mbajeni për 10 minuta dhe përdorimi i saj do ta pakësojë thatësinë dhe lëkura do të jetë më e butë.

Maskë me kos dhe qumësht me yndyrë

Miksoni 1 filxhan kos dhe 1 filxhan qumësht (të papërpunuar) dhe aplikojeni për 15-20 minuta. Kosi është i pasur me kalcium, vitaminë B6 dhe enzima të tjera të dobishme, ndërsa qumështi me yndyrë përmban acid laktik dhe ndihmon për të rikuperuar lëkurën e thatë gjatë dimrit.

Vazelinë

Vazelina njihet për vetitë e saj në kozmetikë, ndaj edhe në këtë rast mund ta përdorni. Thjesht aplikojeni duke e masazhuar në zonat problematike.

Maskë me të verdhën e vezës dhe vaj ulliri

Në një enë të posaçme hidhni 2 të verdha veze dhe 3-4 pika vaj ulliri. Gjithë maskën vendoseni në fytyrë për 20 minuta dhe më pas pastrojeni. Vaji i ullirit është i pasur me antioksidantë dhe vitamina E, ndërsa e verdha e vezës e ushqen lëkurën dhe ndihmon në trajtimin e thatësisë.

Vaji i kokosit

I pasur me acide yndyrore, vaji i kokosit parandalon humbjen e hidratimit dhe e bën lëkurën më të butë njëkohësisht.

Maskë me mjaltë dhe limon

Shtrydhni lëngun e gjysmës së limonit dhe përziejeni me 2 lugë mjaltë. Aplikojeni në fytyrë duke përdorur pambuk dhe lëreni për 10 minuta. Limoni është i pasur me vitaminën C, ndërsa mjalti ka veti anti-inflamatore.

Maskë me banane dhe mjaltë

Shtypni ½ e bananes dhe hidhini 1 lugë çaji me mjaltë. Maskën vendoseni në fytyrë dhe mbajeni për 15-20 minuta. Bananet ushqejnë lëkurën me vitaminë C, B6 dhe A.

Burimi: Stylecraze; artikull i përditësuar*

MOS I HUMBISNI