Disa orë më parë, Alketa Vejsiu postoi në llogarinë e saj të Instagram-it, një fragment bisede të shkëputur nga programi i famshëm italian “Maurizio Costanzo Show”.
Teksa diskutonin rreth programeve të ndryshme, ishte Maurizio ai i cili përmendi i pari Shqipërinë, e më pas fjalën e mori moderatorja e famshme Paola Perego. Ish- moderatorja e “Verissimo”, u ndal gjatë tek televizioni shqiptar, e në veçanti si shembull mori Alketa Vejsiun.
“Ata bëjnë televizion të nivelit të lartë! Unë kam vizituar studiot televizive në Tiranë dhe janë fantastike. Aty kam takuar edhe Alketën, e cila është prezantuese shumë e njohur atje, jemi bërë edhe mike tani. Ajo bën programet e Bonolis-it në Tiranë, si “Piter Pan” dhe është e zonja. Unë kam qenë prezent tek regjistrimi i programeve dhe janë me të vërtetë shumë avantgardë. Ishte surprizë për mua!”- dëgjohet të thotë Perego.
Nga ana tjetër, pas fjalëve të ëmbla Alketa e ka falenderuar përzemërsisht moderatoren duke i treguar gjithashtu mirënjohjen dhe dashurinë që shqiptarët kanë për vendin fqinj.
“Nuk kam fjalë Paola! Je prezantuesja që Shqipëria e ka duartrokitur gjithmonë dhe një grua për tu patur zili. Suksesi është vërtet rezultati i ardhur pas shumë vitesh punë dhe përkushtimi dhe ti ishe një shembull i mirë. Faleminderit për vlerësimin, je model për tu ndjekur. Uroj që një ditë të jem unë ajo që them fjalën time për ty dhe vendin që e duan të gjithë, tek “Maurizio Costanzo Show”. Shqipëria e do Italinë!”- shkruan Alketa e cila më poshtë sqaron fansat e saj për çfarë u fol më sipër.
