Mjaftoi premiera e “Hell’s Kitchen” që një debat i ashpër të niste nëpër rrjetet sociale. Shkurtimisht, në promon e emisionit Renaton e cilësuam si shefin më dramatik, gjë që e vumë re edhe gjatë programit. Më pas Tefta Pajenga, e njohur ndryshe si “Zonja Tefta” reagoi me nota të forta kritike mbi formatin, sjelljen e shefit të kuzhinës dhe konkurrentëve të tjerë.

Kur Zonja Tefta thotë se programi është “kopje e emisioneve të shefit të famshëm britanik Gordon Ramsay”, nuk është se po thotë ndonjë gjë të re, pasi edhe vet Renato e ka pranuar në një intervistë për Top Channel se “prej kohësh kishte dëshirë të sillte në Shqipëri formatin e famshëm.”

Nuk dimë të ketë thënë që është format i ndërtuar nga ai, për aq kohë sa emri dhe struktura e emisionit janë të njëjta. Renato po sjell një version shqiptar të “Hell’s Kithchen”.

Një tjetër çështje e diskutueshme është hedhja e ushqimit. “Vlerësimi i ushqimit dhe mosshpërdorimi i tij janë vlera me të cilat çdo nënë edukon fëmijën. Aq sa moshedhja e bukës së vjetër, të tharë apo kripës janë kthyer në bestytni, si simbole që tregojnë se sa keq është të shpërdorosh,” shkroi zonja Tefta, e cila mund të ketë të drejtë mbi pjesën e vlerësimit të ushqimit, nëse nuk do të bëhej fjalë për një show.

Që nga titulli – që mund të kishte qëndruar shumë mirë edhe në shqip “Kuzhina e Djallit”, “Kuzhina e Ferrit” – kuptohet që konkurrentët kanë përpara një “Djall”, i cili është i gatshëm “për t’i ndëshkuar” nga momenti në moment. Kuptohet shumë mirë që do të ketë presion psikologjik, tension, të ulëritura, pasi në fund të fundit, loja ka për qëllim që të zgjedhë konkurrentët elitë, të aftë për të realizuar receta nga më të vështirat. Fundja është lojë, dikush duhet të jetë në rolin e Djallit.

Për t’iu rikthyer titullit: Njerëzit vërtet s’kanë bukë të hanë, por siç thotë edhe Olti Curri në një video në Insta Stories, “shqiptarët nuk kanë pse kërkojnë llogari tek një program që mbahet me buxhet reklamash [...] Kuzhinierët thjesht gatuajnë dhe të heqin urinë momentale, nuk zgjidhin hallet e popullit. Për ato protestoni diku tjetër."