Dje, Renato Mekollin me të drejtë e cilësuam me humor si “shefin më dramatik, më pjatathyes që na kanë zënë sytë”, nisur nga promoja e emisionit, ku vumë re flakët në kuzhinë, tiganët, pjatat, makaronat që fluturonin nga duart e shef Mekollit, i cili pasi i ulëriste dikujt, vinte duart pas murit, i dëshpëruar, i pashpresë...por jo, gabuam! Është shumë më tepër se dramatik.

Ja shkurtimisht pse:

Një prej konkurrenteve, Suzana, përgatini një sasi të madhe mishi, ndërkohë që i duhej vetëm një racion. Aq u desh, Renato u nervozua. U nxeh. Tava e mishit u thye.

Për një tjetër, shkoi më keq. “Kjo është pjata jote që ti le nam. Ke lënë nam në mënyrën më të keqe. Ça të provoj unë? Lakrën, manaferrën, që thjesht i ke vënë në pjatë, apo këto lulet që janë bërë si ato të gjyshit tim. Merre dhe hidhe në kosh, mos ta hedh unë [sic],” i tha Stiljanës që gati sa nuk qau.

Prisni se ka më. Gjithë nerv, dëboi nga kuzhina Erionin pasi sipas tij po tërhiqte vëmendjen.

Pjata me supë thyheshin ndërkohë që Renato ulëriste “nuk ka mundësi të kërcasin”.

Sektori i sallatave u shkatërrua. Gjithçka në tokë.

Dikush s’e duroi dot “flakën” në “kuzhinën e Djallit” dhe u largua.

Një shef si Renato Mekolli?! Jo, faleminderit!

Në versionin amerikan me 18 sezone, Gordon Ramsey luan rolin e shefit të ligë dhe grindavec. Gjithashtu, 12-20 konkurrentët supozohet të flenë në konvikte të posaçme gjatë pjesëmarrjes në emision. Konkurrentët shqiptarë do të bëjnë të njëjtën gjë.

Formati i “Hell’s Kitchen” konsiston në gara dhe sfida mes dy ekipeve në kuzhinën e një restoranti. Një episod tipik nis me një sfidë, ku ekipi fitues shpërblehet me një lloj aktiviteti argëtues jashtë “Hell’s Kitchen, ndërsa ekipi humbës ndëshkohet me një punë angari. Pjesa e dytë e episodit është shërbimi i darkës, ku secili ekip, në kuzhinat përkatëse, përpiqet të gatuajë menunë e darkës nën mbikqyrjen e shefit pa bërë mjaftueshëm gabime sa për t’u eleminuar. Në fund, ekipi humbës nominon dy anëtarë nga radhët e tyre për t’u përjashtuar nga gara.