Renato Mekolli është egërsuar, por vetëm përkohësisht.

Sot në mbrëmje, në Top Channel nis transmetimin “Hell’s Kitchen”, “një show që ndërthur garën, tensionin, pasionin dhe gatimin.” Top Channel postoi në Instagram promon e emisionit, ku vihen re flakët në kuzhinë dhe tenxheret, tiganët, pjatat, makaronat që fluturojnë nga duart e shef Mekollit. Në një moment, pasi i ulëret dikujt, shefi vë duart pas murit, i dëshpëruar, i pashpresë. Situata duket aq dramatike, sa të ngjall interes.

Formati i “Hell’s Kitchen” konsiston në gara dhe sfida mes dy ekipeve në kuzhinën e një restoranti. Një episod tipik nis me një sfidë, ku ekipi fitues shpërblehet me një lloj aktiviteti argëtues jashtë “Hell’s Kitchen, ndërsa ekipi humbës ndëshkohet me një punë angari. Pjesa e dytë e episodit është shërbimi i darkës, ku secili ekip, në kuzhinat përkatëse, përpiqet të gatuajë menunë e darkës nën mbikqyrjen e shefit pa bërë mjaftueshëm gabime sa për t’u eleminuar. Në fund, ekipi humbës nominon dy anëtarë nga radhët e tyre për t’u përjashtuar nga gara.

Në versionin amerikan me 18 sezone, Gordon Ramsey luan rolin e shefit të ligë dhe grindavec. Gjithashtu, 12-20 konkurrentët supozohet të flenë në konvikte të posaçme gjatë pjesëmarrjes në emision. Siç vihet re në këtë postim, edhe konkurrentët shqiptarë do të bëjnë të njëjtën gjë.

“Hell’s Kitchen” nis transmetimin sot, në orën 21:00 në Top Channel.