Në një deklaratë për mediat, Kryeministri Edi Rama tha se synon të mbyllë gjithë pikat e basteve në vend, duke nisur nga 2019-a.

“Nga 1 janari nuk do të ngrihet asnjë qepen bastesh. Do të pushojnë së funksionuari kazinotë elektronike si dhe bastet sportive dhe çdo lloj basti në pista, me kuaj apo me qen,” tha Rama.

Kryeminstri i bëri thirrje Autoritetit të Medias Audiovizive që të garantojë zbatimin e ligjit përsa i përket reklamave të subjekteve që angazhohen me baste. “Ne do të mbyllim çdo faqe online që do të mbajë reklama bastesh në kundërshtim me ligjin,” shtoi ai.

Sipas Top Channel, varësia nga lojërat e fatit u ka hequr nga xhepi shqiptarëve 132 milion euro vetëm në një vit. Gjendja është alarmante kryesisht në Tiranë, Elbasan e Durrës. Nga ana tjetër, kumari është ndër punëdhënësit më të mëdhenj në sektorin privat.