Dy vite më parë, Albano Bogdo dhe Julian Deda debatuan në një prej lokaleve të Tiranës. U raportua se dyshja e aktorëve ofenduan rëndë njëri-tjetrin, por situata nuk u përshkallëzua në dhunë fizike. Duke marrë parasysh se kishin vite në skenë bashkë, një sherr ishte natyrshëm surprizues për publikun dhe fansat.

Një ditë pas incidentit, Julian Deda iu drejtua Facebook-ut për të sqaruar fjalët: “Jo çdo sherr duhet të interpretohet si luftë. Aq më tepër kur bëhet fjalë për një debat profefsional; besoj është normale për profesionistët që punojnë gjithë ditën bashkë. Pra, asgjë për t’u shqetësuar.”

Në një intervistë me Tv Klan, tani që është pjesë e familjes Klan, Albano Bogdo iu rikthye debatit të para dy viteve dhe fjalëve që e pasuan. “Ne jemi shumë shokë të ngushtë dhe Juli është një nga njerëzit që më ka ndihmuar më shumë për çfarëdolloj halli. I pari që vjen është Juli, Turi ose Visjani. Nuk jemi njerëz që dalim vetëm në skenë. Qajmë halle, ndajmë gëzime,” tha ai.

Nëse keni ende dyshime mbi marrëdhënien miqësore mes Dedës dhe Bogdos, ky i fundit tha në të njëjtën intervistë se “karrierën ia ka borxh Turjan Hyskës dhe Julian Dedës.”