Dje nisi zyrtarisht sezoni i ri televiziv dhe “beteja” më e ashpër ishte ajo e programeve të pasdites, ku Top Channel ia besoi shikueshmërinë Bieta Sulos, që pas eksperiencave si opinioniste në Top Show dhe anëtare e jurisë në “Top Talent”, nisi moderimin e “Ftesë në pesë”, ndërsa Tv Klan preferoi sërish Rudinën me emisionin me të njëjtin emër. Të gjithë u bëmë kuriozë të dinim se cilin program preferuan shqiptarët, kush triumfoi mbi kë dhe pse.
Siç mund ta keni lexuar në të tjetër artikull, emisioni “Rudina” ndoqi të njëjtin format si sezonet e kaluara me disa të ftuar,
ndërkohë që Bieta preferoi intervistën me vetëm 1 personazh (ishin 4 në fakt, por që funksionin si një i vetëm).
Nisur nga votimet në Anabel.al, me një diferencë të lehtë në krye qëndron Bieta Sulo me 54%.
Fakti që emisioni transmetohej për herë të parë, normalisht që favorizonte audiencën, që preferoi si të thuash të dëgjonte historinë e miqësisë 20-vjeçare të balerinave Fatilda Smalaj, Artenisa Ozaj, Olta Ahmetaj dhe Isida Mollaymeri, sesa një përmbledhje të ngjarjeve më të bujshme të verës, me të cilat i është rrahur veshi mjaftueshëm.
Megjithatë bazuar në votimet e “Revista Who” në Instagram, ku audienca është më e re, rezultati përmbyset në anën e Rudinës. E njëjta gjë edhe për votimin e “Prive”.
Për ta përmbledhur, shikueshmëria ndryshon në varësi të audiencës dhe numrit të votuesve, megjithëse le të themi se shifrat janë të barabarta, ose të paktën me një diferencë të vogël. Ajo që vlen të thuhet është se puntatat e ardhshme mbeten më të rëndësishme. Zgjedhja e personazheve është vendimtare, pasi ndonjëherë nuk mjaftojnë disa të ftuar, e ndonjëherë një i vetëm mund të jetë (ose jo) i duhuri, sepse siç duket edhe nga votimi në Anabel.al, pjesa më e madhe është e mendimit se shikueshmëria varet nga personazhi/personazhet, jo nga numri i të ftuarëve. Mbetet për t'u parë.
Pra, sa më personazhe interesantë!
