Sot, më datë 3 shtator, nisi zyrtarisht sezoni i ri televiziv. Ekranet e televizioneve shqiptare u zgjuan prej gjumit veror për të nisur më në fund emisionet, herë të reja, herë me risi dhe herë ato të përhershmet. Siç ndodh zakonisht, beteja e parë nisi mes programeve të pasdites, ku Top Channel ia besoi shikueshmërinë Bieta Sulos me “Ftesë në pesë”,

ndërsa Klani preferoi sërish Rudina Magjistarin me “Rudina”.

Paçka studios dhe veshjes ndryshe, moderatoret nisën në orën 5 programet përkatëse, audienca e të cilëve duhet thënë se i përkiste të njëjtës grupmoshë.

Pasi kërceu me "In My Feelings" të Drake

dhe prezantoi disa prej fotografive të së kaluarës,

Rudina, preferoi të bënte një përmbledhje të ngjarjeve më të bujshme të këtyre muajve. E nisi me ato të aktualitetit dhe kronikës së zezë (ngjarja e vrasjes së 8 familjarëve nga Ridvan Zykaj, zhdukja misterioze në Shkodër e dajës dhe nipit, plumbat në shtëpinë e gazetares Klodiana Lala etj).

Në të njëjtën kohë, teksa tek “Rudina” flitej për vrasje, armë, plumba dhe krime, në studion e Bietës bënin muhabet shtruar katër balerinat: Fatilda Smalaj, Artenisa Ozaj, Olta Ahmetaj dhe Isida Mollaymeri. Qëllimi? Për të folur mbi shoqërinë e tyre 20-vjeçare, pushimet së bashku dhe detaje të tjera të miqësisë së gjatë.

Më pas, Rudina kaloi tek të ftuarit e puntatës së parë: Erion Mustafaraj dhe e bija 15-vjeçare, Dea.

Ndërsa në emisionin e Bietës u fut më pas një pjesë vox-pop me pyetjen “Si kalohen më mirë pushimet, me miqtë apo familjarët?”, e ndjekur nga një video-mesazh i Agnesa Vuthajt për vajzat e ftuara në studio.

Në fund të emisionit, “Rudina” pati si të ftuar Eraldo Rexhon, Gerta Gixharin dhe Eni Shehun për të diskutuar mbi lajmet rozë më kryesore të verës, duke nisur nga sfidat e ndryshme si #KikiChallenge e për të përfunduar tek shtatzënitë më të bujshme të vajzave të showbiz-it shqiptar.

Ftesa për në orën pesë e Bietës zgjaste deri në fund të emisionit, çka do të thotë që vajzat ishin të pranishme deri në mbylljen e programit. Në fund ato realizuan kërcimin e Kiki-t dhe disa lojra të tjera argëtuese.

~Fund~

Tani t’ju pyesim pak në lidhje me dy emisionet e pasdites: Rudina mbajti të njëjtin format si në sezonet e kaluara, duke u bazuar tek intervista me disa të ftuar, ndërkohë që Bieta preferoi (të paktën në këtë puntatë) që intervista të bazohej tek “një i/e ftuar” (ishin disa personazhe në fakt, por që shërbenin si një i vetëm).