Tërmeti që ndodhi gjatë paradites së sotme trembi jo pak njerëz, të cilët iu drejtuan rrugëve për t’u ndjerë më të sigurtë. Në situata të tilla, ku paniku është në nivele të larta, zor se e arsyetojmë situatën siç duhet dhe ndonjëherë mund ta vendosim veten në rrezik. Në vijim po paraqesim disa këshilla të shkurtra e të vlefshme se ç’duhet të bëjmë gjatë dhe pas një tërmeti.
Çfarë duhet të bëni gjatë një tërmeti:
- Mundohuni të ruani qetësinë! Nëse jeni në në mjedise të mbyllura qëndroni aty, nëse jeni jashtë qëndroni sërish jashtë. Është krijuar një ide e gabuar se të vrapuarit jashtë ndërtesës është një veprim i sigurt, mirëpo lëvizja gjatë kohës së tërmetit mund të rezultojë fatale. Ndaj më mirë zvarrituni nën mobilje të forta (për shembull tavolinë) dhe qëndroni aty derisa lëkundjet të përfundojnë. Më pas vraponi për në një ambjent më të sigurt. Nëse jeni jashtë, qëndroni larg linjave të energjisë elektrike, larg ndërtesave, pemëve dhe gjërave që mund të bien.
- Mos përdorni shkrepëse, qirinj apo formë tjetër zjarri.
- Nëse jeni në makinë, ndaloni menjëherë dhe qëndroni brenda saj derisa tërmeti të ndalojë.
- Mos përdorni ashensorët, pasi në shumicën e rasteve bllokohen.
Çfarë duhet të bëni pas tërmetit:
- Kontrolloni ujin, gazin dhe linjat elektrike nëse janë dëmtuar dhe në rast se vini re diçka të çuditshme, mbyllini menjëherë. Nëse nuhasni erën e gazit, hapni dritaret dhe dyert dhe njoftoni autoritetet.
- Qëndroni larg ndërtesave të dëmtuara, larg dritareve dhe xhamave (sepse mund të përsëriten lëkundjet).
- Kini kujdes nga oxhaqet!
- Qëndroni larg zonave të plazhit pasi lëvizjet tektonike mund të shkaktojnë valë të gjata dhe të rrëmbyeshme.