Nuk e njoh Albi Lushin. Nuk kam lexuar ndonjë libër të tij. Madje, deri sot në mëngjes nuk e dija as që ekzistonte. Por, ja ku jemi - unë duke shkruar për të dhe ju duke lexuar për të, falë një inteviste të tij për Revistën Bordo që më mbërriti në telefon dhe që, me sa duket, po bën xhiron e internetit.

Tani, zakonisht, kur dikush bëhet viral për “mendime të thella” mbi gratë dhe marrëdhëniet, ka dy mundësi: ose ka thënë diçka të mençur (ndodh rrallë), ose ka nxjerrë nga goja një kombinim spektakolar të seksizmit, toksicitetit dhe vetëbesimit të tepruar. Fatkeqësisht (por jo diçka që nuk e prisja), Albi bën pjesë në kategorinë e dytë.

Pra, çfarë tha Albi që e bëri internetin të shpërthejë në komente aspak dashamirëse?

Epo, sipas tij, "nuk ka femra të vështira, ka femra që nuk pijnë alkool”. Stop. A e lexuat saktë? Po, po. Nëse keni nevojë për pak çaste sa të përpunoni këtë nivel mendimi, merrni kohën tuaj. E di që truri ndonjëherë refuzon të përpunojë deklarata të tilla.

Pra, sipas Albit, problemi nuk qenka që disa gra thjesht nuk kanë interes për ty - jo, jo, problemi qenka që nuk janë të dehura. Mjafton pak alkool dhe - abrakadabra - gruaja e "vështirë" zhduket si me magji! Çfarë zbuluam sot? Harrojeni pavarësinë, inteligjencën, dëshirat dhe vullnetin e lirë të një gruaje. Zgjidhja? Një shishe verë dhe prit! Gjithçka paska qenë një problem me përqindjen e alkoolit në gjak!

Të nënkuptojë dikush që një grua që ka pirë është më e lehtë për të qenë “e gjitha e jotja” është një deklaratë që i jep dritë jeshile abuzimit emocional dhe jo vetëm…

Por prit, ka ende! Albi gjithashtu deklaron se “nuk ka femra të vështira, ka meshkuj që janë të paaftë të manipulojnë mendjen e një femre”. Albi e sheh manipulimin si aftësi, diçka që burrat duhet ta “përvetësojnë” për të pasur sukses në marrëdhënie. Në botën e Albit, burrat ndahen në dy kategori: ata me lekë dhe ata që dinë të luajnë me psikologjinë e një gruaje. Dashuria, respekti, komunikimi? Jo, këto janë për dështakët! Sipas kësaj logjike, burrat duhet ose të kenë portofol të trashë, ose të kenë master në manipulim.

Duke qenë se Albi paska kaq shumë teori të shëmtuara mbi gratë, ndoshta është duke shkruar një libër të ri. Le t’i propozojmë disa tituj:

1. "Si të mos kuptosh gratë dhe të mburresh për këtë”

2. "Manipulimi për të paaftët: Një guidë për burrat që s’dinë si të krijojnë marrëdhënie të shëndetshme”

3. "Gratë dhe Alkooli: Një histori dashurie që ekziston vetëm në kokën time"

Në fund, nëse ka një gjë që duhet të mësojmë nga kjo deklaratë, është kjo: Manipulimi nuk është aftësi; alkooli nuk është çelësi i suksesit në dashuri. Dhe nëse dikush mendon ndryshe, ndoshta është koha të lexojë një libër të mirë për marrëdhëniet - por jo të shkruar nga Albi Lushi.