S’ka më asnjë videoklip të Mozzikut dhe Getinjos në Youtube. Dy vëllezërit vendosën të largohen nga kompania që i menaxhonte, “On Records”, dhe kjo e fundit vendosi t’i zhdukte të gjitha këngët e tyre.

“Njerëz të dashur, deshëm t’ju informojmë se unë Getinjo dhe vëllai im Mozzik nuk jemi më pjesë e On Records. Këngët tona janë fshirë nga kompania në fjalë. I falenderojmë për punën e përbashkët gjatë këtyre viteve. Vlera jonë nuk do të shuhet asnjëherë, do të shihemi së shpejti me këngë të reja. Ju duam!”, shkroi Getinjo në Instagram.

Nuk do të vononte kundërpërgjigja e kompanisë. Menaxheri Met Elshani u shpreh për “Express”, duke thënë praktikisht se këngët janë fshirë sepse mund të bëjnë ç’tu dojë qejfi me videoklipet, sepse të drejtat e shpërndarjes së këngëve i kanë vetë.

“Të gjitha investimet i ka bërë “On Records”. Të gjitha që ata posedojnë dhe ato projekte janë pronë e On Records dhe kjo kompani bën çfarë të dojë me pronën e vet.”

Ai tha se ata do të përballen me ligjin, pasi janë larguar pa përfunduar kontrata.

"Largimi i tyre ka qenë në mënyrë të njëanshme, pa asnjë arsye për largimin e tyre, thjesht ata kanë marrë një vendim në kokën e tyre pa menduar se ne kemi një kontratë të shkruar me ta, ata do të përballen me ligjin. Besoj se do të jetë shembulli i parë në showbizin shqiptar, ku artistët mos të mendojnë që të shkojë te një kompani të bëjë marrëveshje, të ndërton kompania me qindra, mijëra euro në ta dhe pastaj u bëra i famshëm, i bëra dy euro në xhep dhe të largohem nga kompania. Getinjo ka kontratë edhe 6 vjet, ndërsa Mozzik edhe 5. Ata janë larguar pa paralajmërim, nuk janë paraqitur në vendin e punës dhe vetëm janë larguar"

Kujtojmë se pak muaj më parë, një tjetër këngëtare, Baby G, u largua nga On Records.

Pas reagimit të kompanisë, Getinjo sqaroi publikisht se është mirënjohës për çfarë u ka dhënë On Records e megjithatë, talentin dhe përpjekiet që kanë bërë i kanë çuar aty ku janë. Getinjo u kujton se kanë fituar shumë para nga Mozziku dhe se kanë bërë thjesht punën e tyre.

“Di që kam dhe keni fituar shumë para nga artikulli juaj Mozzik. Pse nuk e gëzuat, nuk latë t’i shikojmë sukseset e përbashkëta. Erdhën shumë artistë tek ju dhe u larguan? Pse nuk e bëtë edhe me ata si me mua, që më drejtoheni: “Të kemi krijuar ne, të kemi bërë ne.”?

Keni bërë punën tuaj e asgjë më shumë. Instrumentale, inçizim dhe videoklip.”