Që Serena Williams do të bënte një dasmë madhështore na e merrte mendja; ajo për të cilën na gufon zemra është fustani i Valdrin Sahitit me të cilin u shfaq aktorja Nicole Ari Parker.
Mediat si “E News” i kushtuan shumë artikuj martesës mes tenistes- që konsiderohet të jetë një prej sportisteve më të talentuara të të gjitha kohërave- dhe Alexis Ohanian, që është themelues i një prej rrjeteve sociale më popullore, Reddit., ceremoni e cila u mbajt në Luisana.
Ndër fustanet e të ftuarave VIP- si Beyonce, Kim Kardashian, Eva Longoria etj.,- ishte edhe fustani i dizenjatorit shqiptar, veshur nga aktorja dhe modelja Nicole Ari Parker, një punim mbi një tyl lejla i zbukuruar me motive lulesh, kombinuar me një pellush të së njëjtës ngjyrë.
Nëse nuhatja jonë nuk gabon, Valdrin Sahiti s’e ka të largët ditën kur do të dizenjojë fustane për ceremoni gjigande si çmimet Oscar apo Grammy.
Njërin hap e hodhi: gjatë çmimeve Oscar në shkurt, aktorja Yvonne Orji zgjodhi një fustan Sahiti për mbrëmjen e fondacionit Elton John.
