Ish-ministri i LSI, Dritan Prifti është ndarë sot nga jeta në moshën 49-vjeçare pas një beteje të gjatë me një sëmundje të rëndë.
Prej vitesh Prifti ishte shkëputur nga politika për t’ju nënshtruar kurimit, fillimisht në Itali e më pas në Gjermani.
Por pavarësisht trajtimeve të gjata, ai e humbi betejën me vdekjen. Dritan Prifti la pas bashkëshorten dhe 4 fëmijë, tre djem dhe një vajzë.
Dritan Prifti lindi në Berat më 27 gusht 1968. Nga viti 2009 deri në 2011 ishte deputet i Lëvizjes Socialiste per Integrim. Dritan Prifti ishte Ministër i Ekonomisë, Tregtisë dhe Energjetikës së Shqipërisë nga viti 2009 deri 2010.
Në prag të zgjedhjeve këtë vit Prifti shpjegoi arsyen pse nuk do të kandidonte apo votonte dhe pohoi publikisht nëpërmjet një statusi në Facebook se prej një viti gjendja e tij shëndetësore ishte rënduar.
“Nuk do kishte kënaqësi më të madhe për mua sesa të kisha mundësi të kandidoja dhe përfaqësoja përsëri ju në politikë. Por nuk mundem fizikisht. Kam mbi një vit që luftoj me një sëmundje agresive dhe të vështirë gjaku. Kurimi vazhdon dhe pak muaj dhe nuk më jep mundësi të shkëputem për fushatë. Kam bindjen që do ta kaloj dhe këtë siklet shpejt.”- shkruante politikani, ndërsa i kërkonte të gjithëve të luteshin për shërimin e tij të shpejtë, ‘që të jenë bashkë në momentin më të parë’.
