Me ardhjen e sezonit të ri televiziv, dy nga televizionet më të mëdha në vend, sollën emisione të reja dhe ndryshuan ato ekzistueset. “Kush vjen për drekë” me Arjola Shehun nisi në Klan, “Pop Culture i zuri vendin “Select” dhe Marina pritet të ngrejë siparin e “C’est la vie”.
Nëse menduan se e mbyllën me kaq, jeni gabuar. Nga një studim i Monitor mbi çmimet e reklamave në televizionet shqiptare, drejtorët e programacioneve në Top Channel dhe Klan zbuluan dhe spektaklet e reja që pritet të nisin së shpejti.
Programet e reja që i shtohen programacionit të Top Channel janë disa emra të njohur si “Dua të të bëj të lumtur,” “100 Milionë”, “Big Brother VIP” dhe “The Voice Kids” me sezonet e radhës. Gjithashtu, Vjollca Dedei shtoi edhe titujt e rinj si “Shiko kush luan në Top Channel,” “VIP në shtëpi” dhe të tjera surpriza. Një nga këta show do të jetë patjetër emisioni që do të moderojë Luana Vjollca të shtunave mbrëma.
Ndërsa në Klan, Armand Shkullaku zbuloi formulën e “C’est la vie”, ku tetë këngëtarë të rinj do të konkurrojnë me tetë personazhe të njohur. Në momentin që ky spektakël do të përfundojë, vendin do t’ia zërë një formulë e re blerë nga Endemol: një numër fëmijësh do të konkurrojnë me njëri tjetrin në gjithë zhanret artistike: muzikë, balet, instrumente, të gjitha në pjesë klasike.
Fundjavat në Klan do të kalohen në shoqërinë e një emisioni për operacionet plastike dhe një tjetër format që pritet të nisë së shpejti është “Travelling”, që do të sjellë destinacione të aksesueshme për të gjithë shqiptarët.
Vizion Plus nga ana tjetër do të rikthejë emisionin historik të Agim Bajkos, “Bypass show” dhe do t’u kushtojë më shumë hapësirë fëmijëve.
Burimi: Monitor
