Ok, si fillim të pranojmë se nuk jemi njohëse dhe AQ të mira të futbollit, por u shqetësuam kur mësuam se një nga futbollistët e kombëtares shqiptare kishte pësuar helmim ushqimor dhe është në gjendje jo fort të mirë shëndetësore. Pastaj i pamë fytyrën...Si nuk e kishim parë më përpara bukuroshin 22-vjeçar nga Gjakova?
Eros Grezda luan si mesfushor me kombëtaren tonë, është 1.80 i gjatë, ka një super-trup të tonifikuar, flokë të qethura shkurt, tipare të mprehta, sy të mëdhenj që mbulohen nga ca vetulla kaleshe dhe duke parë si fluturon mbi fushë, duket shumë i talentuar. Por fatkeqësisht nuk do të jetë i pranishëm në ndeshjen e sotme mes Shqipërisë dhe Maqedonisë që do të zhvillohet në Strumicë.
“Panorama Sport” bën me dije se futbollisti ka pësuar helmim ushqimor dhe nuk është në gjendje shumë të mirë, ndërkohë stafi mjekësor po monitoron situatën dhe do të kryejnë disa analiza për të kuptuar më mirë gjendjen. Dhe ja ku jemi ne, të lënduara, që ajo që mund të ishte dashuria e jetës tonë ndodhet diku larg nesh dhe mbase dikush tjetër i përkëdhel ballin e nxehtë.
