"Pasuria më e madhe për ne është harmonia që kemi në familje. Dhe natyrisht, ai baba që nuk po i ndal dot lotët."
Një familje nga Shkodra tregoi në "E Diela Shqiptare" se një fëmijë me sindromën Down është një bekim, si çdo fëmijë. Zonja Roza dhe zoti Rrokë as e dinin çfarë është sindroma Down kur erdhi në jetë Juliana, por ditën të ishin prindër. Nëna shprehu mirënjohjen e thellë për bashkëshortin e saj, që e konsideroi "babain më shembullor".
Sot, Juliana numëron disa pjesëmarrje në kampionatet e notit në Amerikë, Hollandë, Greqi, Itali, dhe është pjesë e një bande muzikore ku i bie tamburit.
Me krenari, zonja Roza tregoi si e kishin rritur Julianën kur të gjithë e shikonin si një fëmijë me probleme. Rruga nuk ka qenë e lehtë për të dy prindërit, por siç i tregoi ajo Ardit Gjebresë, ata e kanë motivuar dhe e kanë duartrokitur në çdo hap të saj.
"Me kujtohet se gëzimi ynë më i madh, ishte kur Juliana theu një gotë dhe reagoi me një pasthirrmë", tregoi Roza, ndërsa babai Rrokë e ndiqte rrëfimin e saj pa i ndalur lotët për një çast. Julianën nuk e kishin pranuar në shkollë, ku prindërit kishin dashur ta çonin që të socializohej. E vogël, Juliana bëhej xheloze për dy motrat e saj që shfaqnin sjellje ndryshe, por me kalimin e kohës ato të treja u lidhën shumë me njëra-tjetrën.
"E them me plot gojën: Juliana është njësoj si dy vajzat e tjera.", deklaroi Roza.
Një prej momenteve më prekëse ishte kur Gjebrea iu afrua babait të mallëngjyer për të dëgjuar përjetimet e tij. I gjendur përpara admirimit të bashkëshortes, zoti Rrokë e mblodhi veten për të thënë se vetëm ishte treguar baba.
"Mund të them vetëm kaq: Si baba kam bërë vetëm detyrën, asgjë më tepër."
Prindërit e pritën me gëzim ardhjen e Julianës në studion e "Të Dielës Shqiptare". Juliana është prej vitesh një ndjekëse e rregullt e spektaklit të së dielës, dhe një ndër dëshirat e saj ishte të takonte nga afër Ardit Gjebrenë. Kjo ishte edhe surpriza për Julianën, e cila shprehu habi kur pa se ai gjendej pas ekranit, e më pas vallëzuan bashkë.
