‘Unë largohem, boll me këtë estradë’, kanë qenë fjalët e Robert Aliaj në mesin e mbrëmjes së djeshme të spektaklit të kërcimit 'Dance With Me' në Tv Klan.
Ky reagim i artistit ka ardhur pas performancës së dyshes së aktorëve komikë Sejfulla Myftari, njohur nga publiku si Cekja dhe Mariela, të cilët sollën në skenë e kërcimit rolin e nënës dhe fëmijës së sapolindur. Cekja, i veshur si fëmijë, me pelena si dhe batutat që vazhduan mes dyshes pas performancës, kanë bërë që Aliaj të largohet menjëherë nga paneli i jurisë, duke konsideruar se situata po bëhej banale.
"Kjo është një performancë e tmerrshme. Ç'janë këto batuta skandaloze", është shprehur Berti, ndërsa është drejtuar nga dalja. "Unë jam kundër këtij formati që po shfaqet këtu, jam kundër këtij mesazhi, është banalitet. Unë refuzoj t'ju shoh. Tregoni dinjitet dhe klas", kanë qenë disa prej fjalëve të artistit kontroversial.
Pas largimit nga skena, Aliaj është spostuar në një nga zyrat e TV Klan për ta ndjekur shfaqen nga ekrani i televizorit. "Dua ta shoh si teleshikues dhe të jap gjykimin tim si ata që na shohin ne në shtëpi".
Duhet thënë se ky në fakt është e disata herë që Aliaj shprehet kundër performancave të dyshes së humorit sepse sipas tij, ky është një spektakël kërcimi dhe jo skenë estrade.
