Aktorja e njohur Anne Hathaway ka konfirmuar se është në pritje të fëmijës së saj të tretë me bashkëshortin Adam Shulman, duke i dhënë fund spekulimeve që qarkullonin prej javësh në media dhe rrjetet sociale.
Thashethemet për një shtatzëni të mundshme nisën pasi aktorja 43-vjeçare u fotografua gjatë pushimeve të saj verore në Saint-Tropez, ku u pa duke shijuar kohën me familjen dhe miqtë. Në disa prej fotografive, vërehej një bark më i rrumbullakosur, gjë që nxiti diskutime të shumta mes fansave dhe mediave rozë.
Megjithatë, Hathaway zgjodhi të mos komentonte publikisht deri në publikimin e një videoje në profilin e saj në Instagram. Në videon e ndarë me ndjekësit, aktorja shfaqet duke hyrë në xhirime me një veshje të bardhë, ndërsa mban duart përpara barkut. Pak sekonda më vonë, ajo i largon duart, duke zbuluar barkun e saj të rrumbullakosur dhe duke konfirmuar kështu lajmin e shumëpërfolur.
Ky do të jetë fëmija i tretë për Hathaway dhe Shulman, të cilët janë prindër të dy djemve, Jonathan dhe Jack. Çifti është ndër më të rezervuarit në Hollywood kur bëhet fjalë për jetën private dhe rrallë ndan detaje familjare me publikun.
Lajmi i bukur vjen në një periudhë shumë të ngarkuar profesionalisht për aktoren. Hathaway vazhdon të jetë një nga emrat më të kërkuar në industrinë e filmit dhe pritet të shfaqet së shpejti në disa projekte të rëndësishme, përfshirë The Odyssey, The End of Oak Street dhe Verity.
