Jane Fonda, aktorja 82-vjeçare, pranoi se nuk do të bëjë më ndryshime në trup a fytyrë.

“S’mund të pretendoj se s’jam vanitoze, por s’do të bëj më operacione plastike,” tha ajo për Elle Canada. “Duhet të punoj çdo ditë për të pranuar veten; s’e kam aspak të lehtë.”

Tani, aktorja bën shaka me pasiguritë që ka dhe i poston në rrjetet sociale për të frymëzuar të tjerët.

‘Përpiqem ta bëj sa më të qartë që e vuaj prej vitesh mënyrën si dukem,” tha jo. “Postoj foto ku dukem e lodhur apo keq.”

Fonda ka folur më parë për zgjedhjen e saj për të përmirësuar në njëfarë mënyre pamjen. “Nga njëra anë, e urrej faktin që duhej të ndryshoja mënyrën si dukesha për t’u ndjerë mirë. Do të doja të mos isha kështu,” thotë aktorja në dokumentarin e saj për HBO. “Më pëlqejnë fytyrat e plakura, fytyrat që kanë jetuar. Do të doja të isha aq trime, por s’jam.”

Prej dekadash, Fonda ka vuajtur nga bulimia, që gjithashtu ka ndikuar në vendimin e saj për t’iu nënshtruar operacioneve plastike.