Fotoja ku Adrola Dushi puth në buzë të birin, Troin, u ripublikua mbrëmë prej modeles në Instagram, bashkë me një përgjigje të prerë ndaj kritikave.
Adrola Dushi publikoi mbrëmë foton që në fundjavë, u detyrua ta fshinte pas një sërë komentesh ofenduese. Por këtë herë, mamaja e Troit 3-vjeçar shprehet e vendosur ta mbajë këtë foto, pavarësisht asaj se çfarë mund të mendojnë të tjerët.
Në përshkrimin e fotos, Adrola jep një mesazh për të gjithë ata që e gjykojnë se puth në buzë të birin, duke u thënë se mund t’i mësojnë gjithçka, por s’mund t’i mësojnë si t’ia shprehë dashurinë djalit të vet.
“Doja mos të prishja qetësinë e pushimeve të mia, të mos merresha me komentet ofenduese dhe e fshiva këtë foto shumë të dashur për mua, por që ka shkaktuar shumë polemika.
Jam e vetëdijshme që jo çdo postim i imi do shkaktojë simpatinë tek ju, që jo çdo postim do të shkaktojë dashamirësi tek ju, të cilën nuk e kam kursyer asnjëherë.
Por kurrë nuk kam pritur që të më ofendonit për mënyrën si ia transmetoj dashurinë tim biri. Si t’i edukojmë fëmijët ka forma të caktuara, si t’ju flasim atyre ka forma të tjera. Çdokush mund të të japë një këshillë se në çfarë forme t’i bëjmë këto gjëra.
Gjithçka në jetë bëhet sipas disa formave, vetëm transmetimi i dashurisë tek fëmija jot nuk mund të ketë formë as mënyrë. dashuria për fëmijën është ndjenja më e madhe në botë dhe asnjë psikolog, doktor, i afërm apo kushdo qoftë nuk mund të të tregojë si ta shfaqësh atë.
Për gjithçka mund të më kritikoni, por vetëm sesi e shfaq dashurinë ndaj fëmijës tim jo; aq më pak të më ofendoni.”
Në të tilla situata janë vënë edhe personazhe të famshëm të huaj, si Belen Rodriguez, e cila në janar u kryqëzua nga ndjekësit për shkak të mënyrës si e puthte të birin në një video. (shiko këtu)
Ndërkaq, muajve të fundit, David Beckham ka qenë në qendër të polemikave sepse poston foto ku puth vajzën e tij. “E shpifur, perverse. Të puthësh vajzën tënde në buzë është e çuditshme”, i shkruante një ndjekës (lexo këtu).
