Emilia Clarke/ Getty Images

Thuaj ç’të duash, por një fazë “dua të bëhem bionde” e kemi kaluar thuajse të gjitha dhe vajzat e famshme s’janë përjashtim. Disa ndryshojnë komplet pamje, të tjera e kanë kthyer bionden platin në pjesë të identitetit të tyre.

Për shembull Gwen Stefani, kush e mban mend me ngjyrën natyrale të flokëve? S’do e njihnim më. Por ndryshe nga disa, ajo të paktën kujdeset për flokët. Të tjera nuk kanë qenë aq me fat apo të kujdesshme.

Biondja e dekoloruar e flokëve është si dietat ekstreme, mund të funksionojë për pak kohë, por nëse e tepron, të lë pasoja. Dëmtimi i kutikulës, rënia e flokëve dhe këputja e tyre janë realiteti i atyre që s’dinë të ndalen. Dhe po, yje si Emilia Clarke apo Sydney Sweeney janë shembujt e përsosur se përse duhet të dish kur të thuash “mjaft”.

Sydney Sweeney 

Sydney Sweeney u kthye në ikonë bionde si Cassie në Euphoria, por flokët e saj të vërtetë s’e përballuan dot ritmin. “E nisa me highlights në 'Everything Sucks', por për 'Euphoria' u bëra totalisht bionde,” tha ajo në një intervistë. “S’po më ofroheshin shumë role kur isha brune, por biondja po më vriste flokët.” Sydney është kthyer tani brune dhe duket sërish e mrekullueshme.

Miley Cyrus 

Nëse ka një mësim që mund të nxjerrësh këtu, është të mos bëheni bionde kurrë nga mërzia. Miley e provoi më 2016-ën kur u kthye në bionde platin me bojë nga supermarketi (!). “Isha në një apartament të rastësishëm, e mërzitur dhe thjesht...futa duart në flokë,” shkroi në një postim plot pendesë në Facebook ajo asokohe. Dhe po, u pendua. 

Drew Barrymore 

Në 2018-ën, Drew Barrymore provoi të zbardhte flokët e saj natyralisht gështenjë të çelët, por rezultati ishte katastrofë. “Flokët e mi duken të vdekur. Jam... e trishtuar,” shkroi ajo në Instagram. E sinqertë, si gjithmonë. “Kemi pasur të gjithë një lyerje të keqe apo vetulla që më mirë të mos i kishim prekur kurrë. S’do doja gjë tjetër veçse një makinë kohe.”

Emilia Clarke 

Atë që e nisi me paruke në "Game of Thrones", për sezonin e fundit e ktheu në realitet, Emilia Clarke e zbardhi flokun në nuancën “dracarys”, por u pendua. “Flokët u dëmtuan aq shumë, sa më duhej t’i prisja. Dua thjesht t’i rris dhe të kem sërish flokë të shëndetshëm,” tha ajo atëherë. Për fat të mirë, rolet e reja nuk i kanë kërkuar më sakrifica ekstreme.

Zoë Kravitz 

Nga brunia elegante te biondja platin, Zoë ka eksperimentuar plot. Por as flokët e saj nuk i mbijetuan biondes totale. “E di që më duhet t’i pres shkurt fare. Nganjëherë duhet ta pranosh që po i humbet flokët,” u shprej ajo pas gabimit. Fatmirësisht, Zoë duket super edhe me prerje pixie.

_{Burimi: Glam}